Shańyraǵyna shýaq shomyp, shattyq uıalaǵan, bereketti tirligin kúıttep, parasatty perzent tárbıeleýdi maqsat etken otbasy – altyn uıa. «Uıada ne kórseń, ushqanda sony ilesiń» degendeı, ul men qyzdyń tárbıeli, eljandy, kórgendi bolyp ósýi, el men jerge qyzmet etýi otbasy, áke-shesheden alǵan tárbıeden tamyr alady.
Qazaq dalasyndaǵy birligi bekem, tálimi tereń berekeli de bazarly otbasylardy taýyp, olardy mereılendire marapattaý, elge tanytý, úlgi etýdiń mańyzy zor. Qazir túrli sebepti syltaý etip, turmystyq qıyndyqqa tótep bere almaı, minezdegi minmen keleńsiz jaǵdaılarǵa, qaıǵyly oqıǵalarǵa jol berip qoıyp jatqan otbasylar az emes. Sonyń saldarynan balalar da zardap shegýde. Osy oraıda otbasy ınstıtýtyn, adamgershilikti, rýhanılyqty nyǵaıtý, erli-zaıyptylyqtyń mańyzyn taný, ata-analardyń bala tárbıeleýdegi jaýapkershiligin arttyrý, otbasylyq qundylyqtardy, kámeletke tolǵan balalarynyń eńbekke qabiletsiz jáne egde jastaǵy ata-analaryna qamqor bolýyn dáripteý jáne qazaqstandyq otbasynyń jaǵymdy ımıdjin nasıhattaý maqsatyndaǵy «Mereıli otbasy» ulttyq baıqaýynyń orny erekshe.
Mańǵystaýda jyl saıyn atalǵan baıqaýǵa qatysýǵa nıettiler sany artyp keledi. Bul – jaqsylyqtyń nyshany. Bıyl segizinshi ret ótken óńirlik baıqaýǵa oblystyń aýdandary men qalalarynan munaı-gaz, bilim, densaýlyq saqtaý, óner, kásipkerlik jáne ózge de salalardan 59 otbasy ótinim berdi. Baıqaýǵa kópbalaly otbasylar men jas otbasylar belsendi qatysty. Osylaısha, baıqaýdyń oblystyq kezeńine 14 otbasy joldama aldy. Olardyń ishinde ustazdar dınastııasy, ónerli áýletter, kásipker otbasylar, ata kásibin urpaqtan-urpaqqa mıras etken eńbek áýletteri bar.
Oblystyq kezeńge ótken Aqtaý qalasynan – Eshmuhanovtar, Kóshkinbaevtar jáne Toqsanovtar otbasy, Beıneý aýdanynan – Sebepbaevtar men О́tejanovtar, Qaraqııa aýdanynan – Begnııazovtar men Qonaıuly otbasy, Mańǵystaý aýdanynan – Uzaqbaevtar men Tuńǵatarovtar otbasy, Munaıly aýdanynan – Iztileýovter men Motyevtar otbasy, Túpqaraǵan aýdanynan – Jámıevter, Ýrazalıevter jáne Jaýynovtar otbasy – barlyǵy da óz óńirlerine úlgili úıelmen retinde tanymal. Sondyqtan ózderin ulttyq otbasylyq baıqaýdan kórýge senimdi bolǵany anyq.
Alaıda júlde sanaýly. «Mereıli otbasy-2022» ulttyq baıqaýynyń oblystyq jeńimpazdaryn anyqtaý jónindegi óńirlik komıssııanyń sheshimine sáıkes 1-oryndy – beıneýlik Sebepbaevtar otbasy, 2-oryndy – Mańǵystaý aýdanynan qatysqan Tuńǵatarovtar otbasy jáne 3-oryndy Túpqaraǵan aýdanynan kelgen Jaýynovtar otbasy ıelendi. Sondaı-aq saıystyń oblystyq kezeńine qatysqan 11 otbasyna laýreat ataǵy berilip, jeńimpaz otbasylar baǵaly syılyqtarmen marapattaldy. Respýblıkalyq kezeńde Mańǵystaý oblysynyń otbasylyq mereıin kóterip, mártebesin arttyrý Sebepbaevtar otbasyna buıyrdy.
Áýlettiń úlkeni Lesbaı Sebepbaev 1935 jyly Mańǵystaý aýdany, Jyńǵyldy aýylynda dúnıege keldi. 1983 jyly qarakól qoıyn ósiretin keńshar uıymdastyrýǵa baılanysty qurylǵan Syńǵyrlaý keńsharynda bas ınjener, keıin uzaq jyldar bilim aǵartý salasynda eńbek etip, Syńǵyrlaý aýyldyq aqsaqaldar keńesiniń tóraǵasy qyzmetin atqardy. Lesbaı Sebepbaev 71 jasynda ómirden ozdy. Otanasy Kúlásh Túıeshıeva 1940 jyly Mańǵystaý aýdanynyń Jyńǵyldy aýylynda dúnıege kelgen. «Batyr ana», on saýsaǵynan óner tamǵan ismer, qazaqtyń qolónerin qasterlegen qolóner sheberi. Zeınetkerlikke shyqqannan keıin de qazaqtyń ulttyq kıimderin tigýdi qolǵa alyp, tiginshilikpen aınalysyp keledi. Otaǵasymen birge 11 balany ósirip, búginde 41 nemere, 46 shóbere kórip otyrǵan eńbekqor úlgili otbasy. Otbasynan órbigen balalary arasynda munaı salasynyń sheberleri bar, bilim salasynda Bilim jáne ǵylym mınıstriniń Qurmet gramotasy jáne Alǵyshattarymen, «Y.Altynsarın» tósbelgisimen, «Eren eńbegi úshin» medalimen marapattalǵan tájirıbeli ustazdar bar. Endi biri – mádenıet salasynyń kásibı mamany retinde óńirimizdiń tarıhy men etnografııasyn zertteýge, nasıhattaýǵa atsalysyp júrgen úzdik qyzmetker. Sebepbaevtar otbasy – 11 bala, 41 nemere, 46 shóbere tárbıelep ósirip otyrǵan, otbasy músheleriniń sany 100-ge jetken úlken qarashańyraq. Áýletten 16 muǵalim, 11 jeke kásipker, 7 munaıshy, 5 ekolog, 3 kitaphanashy, 4 memlekettik qyzmetker, 2 «Altyn belgi», 5 «Úzdik attestat» ıegeri shyqqan. Qazirgi tańda nemereniń úlkeni 35 jastaǵy jeke kásipker bolsa, shóbereniń aldy – 18 jastaǵy stýdent.
«Balańdy óz tárbıeńmen tárbıeleme, ultyńnyń tárbıesimen tárbıele» degen támsildi ustanym etken otbasy úlkenderdi qurmetteý jáne syılaý, adamgershilikti joǵary qoıý, adal eńbek etýdi negizgi baǵyt etip alǵan.
Mańǵystaýlyqtar yntymaǵy uıyǵan Sebepbaevtar otbasynyń respýblıkadan júldeli oralýyn kútýde. Berekeli otbasy – ult baılyǵy, memleket tiregi. «Mereıli otbasy» baıqaýyna qatysatyn otbasylar sanynyń azaımaýy kóńil qýantady.
Mańǵystaý oblysy