Premer-Mınıstrdiń birinshi orynbasary Roman Sklıar GFR Syrtqy ister mınıstri Annalena Berboktyń jumys sapary aıasynda Qazaqstanǵa kelgen Germanııanyń ekonomıkalyq delegasııasymen kelissóz júrgizdi.
GFR SIM Ekonomıkalyq máseleler jáne turaqty damý departamentiniń basshysy Olıver Rentshler bastaǵan delegasııa quramyna birqatar nemis kompanııasynyń, onyń ishinde Svevind Group, Knauf, Lufthansa, Goldbeck Solar jáne t.b. ókilderi kirdi.
Kezdesý barysynda Qazaqstan-Germanııa saýda-ekonomıkalyq jáne ınvestısııalyq yntymaqtastyǵyn tereńdetý, «jasyl» ekonomıkany damytý, birlesken jobalardy iske asyrý máseleleri talqylandy.
О́z sózinde R.Sklıar Germanııanyń Qazaqstannyń Eýropalyq odaqtaǵy eń mańyzdy seriktesi bolyp tabylatynyn atap ótti jáne elimizdiń energetıka, ónerkásip, kólik jáne logıstıka, aýyl sharýashylyǵy jáne t.b. salalardaǵy áriptestikti odan ári tereńdetýge múddeli ekendigin málimdedi.
Onyń aıtýynsha, Qazaqstan jalpy quny 1 mlrd dollar bolatyn 100-ge jýyq óńdelgen taýar túrin jetkize alady.
О́z kezeginde ekonomıkalyq delegasııa basshysy Olıver Rentshler eki eldiń memlekettik organdary men bıznes qurylymdary arasyndaǵy ózara is-qımyl deńgeıin joǵary baǵalady, sondaı-aq Qazaqstan Úkimetiniń nemis kompanııalarymen yntymaqtastyq jónindegi arnaıy jumys tobynyń tıimdiligin atap ótti.
Jalpy, nemis delegasııasynyń ókilderi energetıka jáne kólik salalarynda yntymaqtastyqty nyǵaıtýǵa, jańa ken oryndaryn ıgerýge daıyn ekendikterin bildirdi.
Kelissóz sońynda «suraq-jaýap» sessııasy ótti, onda ekijaqty ózara is-qımyldyń praktıkalyq máseleleri talqylandy. Budan basqa, kelissóz qorytyndysy boıynsha bolashaqta osyndaı kezdesýlerdi uıymdastyrý týraly ýaǵdalastyqqa qol jetkizildi.