Qazaqstan Respýblıkasy prezıdenttigine kandıdat Meıram Qajyken úgit-nasıhat naýqany aıasynda О́skemendegi «Vostok moloko» korporasııasyna bardy.
Úmitker áýeli ujym qyzmetkerlerine óziniń saılaýaldy tuǵyrnamasynyń negizgi bólimderin túsindirdi. Jıynǵa qatysqan jumyskerlerdiń tarapynan ekonomıkalyq reformalar men azamattyq qoǵamdy damytýǵa qatysty suraqtar týyndady. О́z kezeginde kásiporyn basshysy Seıiljan Saılaýbaev ınflıasııanyń ósýi, halyq pen bıznestiń nesıege batýy, eń tómengi jalaqy kórsetkishi sııaqty problemalyq máseleler boıynsha pikir bildirdi.
M.Qajyken aıtylǵan pikirlermen kelisip, bul taqyryptardyń basym bóligi saılaýaldy baǵdarlamaǵa engizilgenin aıtty. «Búgingi tańda eń tómengi jalaqynyń qalaı anyqtalatyny belgisiz. Men ony ındeksteýdi ashyq etip qana qoımaı, EYDU (ekonomıkalyq yntymaqtastyq jáne damý uıymy) damyǵan elderiniń deńgeıine jetkizýdi usynamyn. Tıisinshe ETJ 60 myń emes, kem degende 150 myń teńgeni quraıtyn bolady», dedi kandıdat.
Ol aldaǵy ýaqytta eńbek salasynda áleýmettik áriptestikti damytýdy josparlap otyrǵanyn jetkizdi. «Kásipkerler men kásipodaqtar kez kelgen máselelerdi birge sheshýge tıis. Al kóshbasshy zań bolýy kerek. Biz árkimniń múddesi eskeriletin jáne ár azamat ózi úshin sheshim qabyldaýǵa, óz múddelerin qorǵaýǵa quqyǵy bar memleket quryp jatyrmyz», dep atap ótti kandıdat.