Aqparat jáne qoǵamdyq damý mınıstri Darhan Qydyráli Shymkentte qalalyq Qazaqstan halqy Assambleıasy janyndaǵy qoǵamdyq qurylymdardyń jetekshileri, etnomádenı birlestikterdiń tóraǵalarymen kezdesti.
Vedomstvo basshysy óńirge sapary barysynda «Dostyq úıi» bazasyndaǵy «Birlik alańynyń» jumysymen tanysyp, jergilikti etnos ókilderimen dóńgelek ústel basynda ashyq pikir almasty.
Qoǵamdyq kelisim men jalpyulttyq birlik salasyndaǵy memlekettik saıasat aıasynda birlese atqaratyn jumystarǵa toqtalǵan mınıstr úshinshi megapolıs turǵyndarynyń berekeli birlik jolyn jalǵap otyrǵanyna alǵys aıtty.
– Ulysymyzdyń uıytqysy atanǵan ońtústik jurtshylyǵy árdaıym ıgi isterdiń bastamashysy bolyp otyr. Qalalyq assambleıa músheleri qoǵamdaǵy tuǵyrly tatýlyǵymyzdy bekemdep, qaıyrymdylyq baǵytyndaǵy jumystarǵa turaqty atsalysýda, –dedi Darhan Qýandyquly.
Jıynda Qazaqstan ózbekteri etnomádenı birlestikteri «Dýstlık» qaýymdastyǵynyń tóraǵasy, qalalyq QHA tóraǵasynyń orynbasary Ikramjan Hashımjanov qalalyq assambleıanyń atqarǵan jumystaryn baıandap, ózara baýyrlastyqty nyǵaıtýǵa arnalǵan is-sharalardy respýblıkalyq deńgeıde aqparattyq qoldaý kórsetýge shaqyrdy. Al slavıan etnomádenı birlestiginiń tóraǵasy Natalıa Romanova «Qazaqtaný» jobasy boıynsha iske asyp jatqan bastamalardy aıtyp, mınıstrlik arqyly «Qazaqtaný» arnaıy aqparattyq resýrsyn qurýdy usyndy. Túrik etnomádenı birlestiginiń tóraǵasy Latıpsha Asanov ınvestısııa tartý, «Assambleıa jastary» uıymy qalalyq ókildiginiń basshysy Nurbolat Meıirbekov jastardy qoldaý týraly sóz sóılep, usynys-pikirlerin aıtty.
Assambleıa múshelerin tyńdaǵan mınıstr ultymyzdy uıystyratyn tyń jobalarǵa memleket tarapynan árdaıym demeý bolatynyn jetkizip, etnos ókilderi arasynda memlekettik tildi damytý men «Qazaqtaný» jobasyn jańǵyrtyp, damytýǵa qoldaý bildiretinin atap ótti.
– Shymkent – shyraıly shahar bolýymen qatar, shuǵylaly óńir. Búginde qala aýmaǵynda turatyn etnos ókilderi berekeli birlik jolyndaǵy bastamalar aıasyna toptasyp, eldik jolyndaǵy isterge atsalysyp keledi. Tilimiz – tatýlyqtyń tili bolýy tıis. Bul baǵytta shymkenttik assambleıa músheleri ózge aımaqtarǵa úlgi bola alady, – dedi mınıstr.
Aıta keteıik, búginde Shymkentte 1 mıllıon 112 myńnan astam halyq turady. Ulttyq quramy boıynsha turǵyndardyń 30 paıyzdan astamyn ózge etnos ókilderi quraıdy. Qala aýmaǵynda 17 etnomádenı birlestik jáne olardyń janynda 19 shyǵarmashylyq uıym men 3 jeksenbilik mektep jumys isteıdi.