ASTANA. 28 mamyr. Búgin Astanada «Nur Otan» partııasy Tóraǵasynyń birinshi orynbasary Baýyrjan Baıbek L.N.Gýmılev atyndaǵy Eýrazııa ulttyq ýnıversıtettiń professorlyq-oqytýshylyq quramymen jáne stýdenttermen kezdesti. Bul týraly «QazAqparat» habarlady.
Kezdesýde Eýrazııalyq ekonomıkalyq odaqtyń qurylýy týraly jáne elimizdiń bolashaq damýynyń áleýeti talqylandy.
Baýyrjan Baıbek: «Menińshe, Eýrazııalyq ekonomıkalyq odaqty qurý týraly tarıhı sheshimniń qarsańynda ekonomıkalyq yqpaldastyqtyń múmkindikteri men keleshegi tóńireginde talqylaýlar júrgizý mańyzdy. Ekonomıkalyq yqpaldastyqqa túsý barysynda biz bul tek joldyń bastapqy kezeńi ǵana ekenin túsinýimiz kerek», – dedi.
Jıynda B.Baıbek Memleket basshysy Nursultan Nazarbaevtyń osydan 20 jyl buryn atap ótken ekonomıkalyq ıntegrasııanyń negizgi prınsıpterine de toqtaldy.
«Nur Otan» partııasy Tóraǵasynyń birinshi orynbasary: «Sol kezde bizdiń Memleket basshysy aıtqan kóptegen máselelerdi kópshilik jetesine jetip, túsingen joq. Elbasy sol kezde yqpaldastyqtyń tórt basym baǵytyn atap ótti. Birinshiden, ol – pragmatızm. Memleket pen halyqtyń múddelerin eskerý arqyly tek qana ekonomıkalyq baılanystardy damytý. Ekinshiden, Memleket basshysy kópdeńgeıli, kópjyldamdyqty ıntegrasııany sóz etti. Úshinshiden, yqpaldastyq erikti, ashyq jáne teńquqyly bolýy tıis dedi. Tórtinshige aımaqtyq qaýipsizdikti jatqyzdy. Búgin álemde túrli qaýip-qaterler kóp. Birlese júrip, damyǵan mańyzdy. Myna básekege jáne tartysqa toly dúnıede jalǵyz júrý qıyn», – dedi.
Aldaǵy ýaqytta osyndaı jıyndar respýblıkanyń barlyq joǵary oqý oryndarynda ótedi dep kútilýde.
Joldybaı Bazar.
Derekkóz: «QazAqparat».
Foto: primeminister.kz.