Saǵı Jıenbaev atyndaǵy oblystyq jasóspirimder kitaphanasynda «Qarasózdiń has sheberi» atty jazýshy, Memlekettik syılyqtyń laýreaty Qajyǵalı Muhanbetqalıulynyń 80 jyldyǵyna oraı ádebı kesh ótti. Maqsaty – ólkemizden shyqqan osynaý qarymdy qalamgerdiń ómir jolynan jas býynǵa aqparattar usyný. Jazǵan shyǵarmalaryn, kitaptaryn oqyrman qaýymǵa nasıhattaý.
Atalǵan is-sharaǵa jazýshynyń baýyrlary Shoqan men Kóbegen Ermuhanbetovter, aqyn, «Aqtóbe» telearnasynyń ardageri Jaqsylyq Aıjanov, Qazaqstan Jazýshylar odaǵy Aqtóbe fılıalynyń tóraǵasy, «Úsh taǵan» jýrnalynyń bas redaktory Ertaı Ashyqbaev jáne basqa da zııaly qaýym ókilderi qatysty.
Ádebı kesh barysynda №60 jalpy bilim beretin orta mekteptiń oqýshysy Álıhan Batyrqanov «Erke sylqym» kúıin oryndasa, Janerke Nııazbek, Gúlnaz Murat, Asanáli Áshim patrıottyq taqyryptaǵy óleńder oqydy. Sonymen qatar jazýshy týraly derekterden beınerolık kórsetildi. Jazýshynyń baýyrlary qalamgerdiń ómir joly týraly sóz qozǵady.
Qajyǵalı Muhanbetqalıuly Aqtóbe oblystyq televızııa jáne radıo komıtetinde redaktor, oblystyq «Kommýnızm joly» gazetinde ádebı qyzmetker boldy. Almatydaǵy «Qazaqstan» baspasynda aǵa redaktor, «Juldyz» jýrnalynda bólim meńgerýshisi, «Qazaq ádebıeti» gazetinde jaýapty hatshy, «Jańa fılm» jýrnalynda bas redaktor qyzmetterin atqardy.
Ádebı keshke «Kemeńger eldiń kórkem jazýshysy» atty taqyryptyq kitap kórmesi qoıylyp, oǵan bıblıografııalyq sholý jasaldy.
Laýra ERIKQYZY,
jasóspirimder kitaphanasynyń kitaphanashysy
AQTО́BE