Prezıdenttikke úmitker Qaraqat Ábden Shymkent qalasynyń saılaýshylarymen júzdesip, jınalǵan jurtty óziniń saılaýaldy baǵdarlamasymen tanystyrdy.
Qala turǵyndary, týrıstik sala mamandary, qazaq ulttyq taǵamdaryna negizdelgen meıramhanalardyń ókilderi men kásipker áıelder qatysqan kezdesý barysynda qoǵamdaǵy ózekti máseleler men otandyq týrızmdi damytý suraqtary talqylandy.
«Shymkent qalasynyń ishki jáne syrtqy týrızmdi damytýda áleýeti óte zor. Jańa jumys oryndarynyń ashylýy men ınfraqurylymnyń jaqsarýy – týrızmdi damytýdyń bir ǵana qyry. Osy salany jetildirý arqyly biz elimizdiń ulttyq jáne tarıhı-mádenı qundylyqtaryn keńinen nasıhattaı alamyz. Qazaq ulttyq taǵamdaryn jańǵyrtyp, týrısterdi qyzyqtyrýdyń eń utymdy baǵytyn damytyp júrgen kásipkerlerdiń de bastamalaryna qoldaý kórsetý kerek», dedi Q.Ábden.
Saılaýshylarmen kezdesýden keıin kandıdat óńirdiń tynys-tirshiligimen tanysyp, «Kóksaraı» fýtbol týrnıriniń jeńimpazdarymen kezdesti. О́ziniń quttyqtaý sózinde Qaraqat Ábden buqaralyq sport pen salamatty ómir saltyn nasıhattaýdyń mańyzyn erekshe atap ótti.
Budan bólek, kandıdat aımaqtaǵy saılaýaldy shtabynyń ókilderimen júzdesip, úgit-nasıhat jumystarynyń nátıjelerimen tanysty.