Qazaqstan Respýblıkasy prezıdenttigine kandıdat Meıram Qajyken jemqorlyqqa qatysty zańdy qatańdatý qajet ekenin aıtty. Kandıdat bul usynysyn Almaty qalasynda sybaılas jemqorlyqqa qarsy is-qımyl taqyrybynda ótken dóńgelek ústelge qatysqan kezde ortaǵa saldy.
Jıynǵa qatysqandar sybaılas jemqorlyqtyń elimizdiń áleýmettik-ekonomıkalyq damýyna keri áserin, osy qubylysqa qarsy is-qımyl jónindegi sheteldik tájirıbeni talqylady.
Sybaılas jemqorlyqty qabyldaý ındeksiniń (CPI) halyqaralyq reıtıngisinde Qazaqstan 2021 jyldyń qorytyndysy boıynsha álemniń 180 eliniń arasynda 102-shi orynda tur.
Meıram Qajyken paraqorlyqtyń, laýazymdy tulǵalardyń ókilettikterin asyra paıdalanýdyń aldyn alýǵa qatysty máselelerdi búkpesiz jetkizip, naqty zańdar men erejeler qýatty bolmasa quqyqtyq memleket qurý múmkin emes ekenin aıtty.
«Jemqorlyqty joıý úshin qatań zańdar qajet jáne olar óz kúshinde oryndalýy kerek. Sybaılas jemqorlyq áreketteri ár adamnyń sana-sezimine, mádenıetine baılanysty. Halyqqa esep beretin myqty ári ashyq azamattyq qoǵam qajet. Iаǵnı myqty azamattyq qoǵam, táýelsiz kásipodaqtar, kásipkerler qaýymdastyǵy jáne basqa da kóptegen uıymdardyń kúshi birigýi kerek. Sonda adamdar memlekettiń kelisimsharttaryn, bıýdjetti, jer ýchaskelerin bólý sekildi áreketterin baqylaı alady», dedi M.Qajyken.