Prezıdenttikke kandıdat Qaraqat Ábden Shymkent qalasyndaǵy «AGF Grýpp» tigin fabrıkasynyń ujymymen kezdesti. Kezdesý barysynda kandıdattyń baǵdarlamasy tanystyrylyp, qoǵamdaǵy ózekti máseleler talqylandy.
Tigin fabrıkasy ujymynyń basym kópshiligi áıelder qaýymy bolǵandyqtan olardyń tarapynan kandıdat usynǵan analardy, kópbalaly otbasylardy qoldaý jáne ulttyq qundylyqtardy dáripteýge qatysty is-sharalarǵa basa mán berildi.
«Otbasy men analardyń áleýmettik máseleleri – el ekonomıkasynyń damýyn kórsetetin birden-bir kórsetkish. Meniń saılaýaldy baǵdarlamamda bul suraqtarǵa kóp kóńil bólingen. Árbir otbasy, ásirese kóp balaly otbasynyń rýhanı-ónegelik áleýeti zor, sondyqtan ol halyqtyń ǵasyrlar boıy jınaqtalǵan ulttyq qundylyqtaryn saqtap, urpaqtan-urpaqqa jetkizetin mańyzdy uǵym bolyp tabylady. Qazirgi kezde otbasy ınstıtýtyn jan-jaqty nyǵaıtý, onyń mártebesin arttyrý, kópbalaly analarǵa qoldaý kórsetý erekshe mańyzdy», dedi Q.Ábden.
Kezdesýge OBSE baıqaýshylar mıssııasynyń ókilderi Krıstofer Makkaloý men Krıstına Bogdanova qatysty. Olar úgit-nasıhat naýqanynyń barysymen, Qaraqat Ábdenniń saılaýaldy shtabtarynyń jumysymen tanysty.
Aıta keteıik, kandıdat Q.Ábden osy ýaqytqa deıin 8 oblysta 30-dan astam kezdesý ótkizdi.