Qazaqstan Respýblıkasy prezıdenttigine Jalpyulttyq sosıal-demokratııalyq partııasy atynan kandıdat Nurlan Áýesbaev Mańǵystaý oblysyna baryp, Janaózen qalasyndaǵy «Bilim-Innovasııa» lıseıi ǵımaratynda saılaýshylarmen kezdesý ótkizdi.
Is-shara barysynda kandıdat jınalǵan qaýymǵa óziniń saılaýaldy baǵdarlamasynyń basym baǵyttary jóninde baıandap berdi.
Nurlan Áýesbaevtyń pikirinshe, munaı-gaz salasy el bıýdjetiniń basym bóligin quraıdy. Degenmen atalǵan óńir ınfraqurylym jaǵynan artta qalǵan aımaqtardyń biri bolyp sanalady. Munyń bári teńgerimsiz óńirlik saıasattyń saldary. Kandıdat barlyq deńgeıli, onyń ishinde oblystyq ákimderdi saılaýdy engizý arqyly bul tyǵyryqtan shyǵýǵa bolady dep esepteıdi.
Reformalardyń biri retinde bıýdjettik rásimderdi jetildirý usynylady. Ár eldi mekende ózine tıesili ashyq bıýdjet jasaqtalyp, naqty ýaqyt rejiminde onlaın túrde memleket aqshasynyń qalaı jáne qaıda jumsalyp jatqandyǵy ashyq kórsetilýge tıis.
Budan bólek Nurlan Áýesbaevtyń saılaýaldy baǵdarlamasynda qazaqstandyqtardyń ómir sapasynyń standartyn engizý usynylady. Qujatta azamattarymyzdyń sapaly tamaqtanýynan bastap, demalysyna deıingi barlyq qajettilikteri jan-jaqty qarastyrylýy qajet.