Qazaqstan Prezıdenti elimizdegi eń iri megapolıske saparynda qala jurtshylyǵymen arnaıy kezdesip, Almatynyń el tarıhynda aıryqsha orny bar ekenin atap ótti.
Bul jıynda turǵyndardy, ásirese jastardy baspanamen qamtamasyz etý jaıy da qozǵaldy. Elimizdegi eń úlken qalada baspana máselesin sheshý jaıy qashanda kúrdeli. Ákimdik jalǵa beriletin turǵyn úı salý úshin ınvestorlarǵa tartymdy bolatyn tıimdi tásilder oılastyrýǵa tıis ekeni eskertildi. Kelesi jyldan bastap turǵyn úı qurylysyn jyl saıyn 10 paıyzǵa arttyrý qajet ekeni aıtyldy.
Prezıdent Almaty qalasyn damytýǵa qatysty máselelerdiń únemi baqylaýda ekenin atap ótip, qala jurtshylyǵyn aldaǵy maqsattardy birlesip iske asyrýǵa shaqyrdy. Al stýdenttermen jáne jas ǵalymdarmen kezdesýinde memleket damýyna jastardyń qosatyn úlesi jáne Ádiletti Qazaqstandaǵy jastar saıasatyn jetildirý jónindegi paıymdarymen bólisti.
Memleket basshysy baıandamasynda buǵan deıin negizinen elimizdiń qazba baılyqtaryna, munaı qoryna arqa súıep kelsek, endi zamannyń, ýaqyttyń yńǵaıyna qaraı adam kapıtalynyń mańyzy artqan dáýirge qadam basqanymyzǵa toqtaldy.
Sondaı-aq aldaǵy ýaqytta bilim kýltke aınalyp, tehnıkalyq mamandyqtarǵa básekelestik artatynyn jetkizdi. Qazirgi tańdaǵy basy ashyq másele – elimizdiń eń iri megapolısinde 37 myń stýdentke jataqhana jetispeıtinin, turǵyn jaı tapshylyǵyn joıý úshin tyń tásilder ázirlenetinin atap ótti. Bul jańalyqty kezdesýge barǵan shákirtterimiz de, oqytýshylarymyz da qýana qabyldady. О́ıtkeni Ál-Farabı atyndaǵy Qazaq ulttyq ýnıversıteti maýsym aıynda oqý ornyna resmı saparmen kelgen Prezıdentke qalashyq qurylysynyń II kezeńin salý josparyn tanystyrǵan edi. Damý jospary boıynsha kampýs aýmaǵynda oqý korpýstary, qyzmettik turǵyn úı, jataqhanalar salý kózdelip otyr.
Ázirge qalashyq aýmaǵyndaǵy jataqhanalardy keńeıtý arqyly oryn sanyn kóbeıtýdi qarastyryp otyrmyz. Jaqynda №5 jáne №10 jataqhana kúrdeli jóndeýden ótip, stýdentter ıgiligine berildi. №10 jataqhananyń ashylýyna Ǵylym jáne joǵary bilim mınıstri Saıasat Nurbek arnaıy qatysty. Bul jataqhanalardy jóndeý jumystary barysynda turǵyn jaı keńeıtilip, ár bólmege qosymsha bir tósekten qoıyldy. Osy tásil arqyly aldaǵy ýaqytta jataqhanalardaǵy oryn sanyn 2 myńǵa arttyrý nıetimiz bar.
Prezıdent atap ótkendeı, sheteldik jetekshi ýnıversıtettermen akademııalyq yntymaqtastyǵymyz da nyǵaıa tústi. Memleket basshysynyń qoldaýymen QazUÝ bazasynda MIFI (Máskeý ınjenerlik-fızıkalyq ınstıtýty) Ulttyq zertteý ıadrolyq ýnıversıteti fılıaly ashyldy. Sondaı-aq bıyl bilim ordasynyń Ystanbul men Bishkektegi fılıaldary jumys isteı bastady.
Memleket basshysy keler jyldyń 1 shildesinen bastap oqytýshylardyń, sondaı-aq joǵary oqý oryndary men ǵylymı-zertteý ınstıtýttaryndaǵy ǵalymdardyń eńbekaqysyn ulǵaıtý mehanızmderin pysyqtaýdy tapsyrdy. Qazirgi tańda QS álemdik reıtınginde 150-orynǵa kóterilgen ulttyq ýnıversıtette oqytýshy-professorlar quramynyń jalaqysy aıtarlyqtaı ósti. 2021-2022 oqý jylynan bastap oqytýshy jalaqysy – 38, aǵa oqytýshyniki – 75, dosenttiki – 88, professordyń jalaqysy 163 paıyzǵa artty. Búginde oqytýshy – 200 myń, aǵa oqytýshy – 280 myń, dosent – 330 myń, professor 500 myń teńge jalaqy alady.
Prezıdent kezdesý qorytyndysynda «Bizdiń stýdentterimiz ben jas ǵalymdarymyz elimizdegi reformalarǵa qoldaý bildirip, ózgeristerge senetini sózsiz. Biz bul ózgeristerdiń bárin elimizdiń keleshegi – búgingi jáne erteńgi jastar úshin jasap otyrmyz. Biz memleket pen qoǵam damýynyń jańa baǵyt-baǵdaryn tek birge aıqyndaı alamyz», dep, jas býyn ókilderine erekshe úmit artty.
Janseıit TÚIMEBAEV,
Ál-Farabı atyndaǵy Qazaq ulttyq ýnıversıtetiniń Basqarma tóraǵasy-rektor