Prezıdenttikke kandıdattardyń biri Jıgýlı Daırabaevtyń senimdi ókili Nıkolaı Arsıýtın Soltústik Qazaqstan oblysynyń Qyzyljar aýdanyndaǵy «Qyzyljar sút» JShS kásipornyna baryp, eńbek ujymymen kezdesti.
Kezdesý barysynda kandıdattyń saılaýaldy baǵdarlamasynyń negizgi baǵyttary baıandalyp, partııanyń jumysy týraly egjeı-tegjeı aıtyldy.
Jıgýlı Daırabaev óziniń baǵdarlamasynda Qazaqstan shıkizaty baı memleket bola tura, óz halqyn qoljetimdi otynmen jáne energetıkalyq resýrstarmen qamtamasyz ete almaı otyrǵandyǵyn kórsetken. Osy rette kópshilikpen kezdesken Nıkolaı Arsıýtın baǵdarlamada aýyl sharýashylyǵy salasyn damytýǵa basymdyq berilgenine toqtaldy.
«Aýyl» partııasy aýyldyq eldi mekenderdi jańǵyrtý jónindegi uzaq merzimdi ulttyq strategııany zań deńgeıinde qabyldaýdy usynyp otyr. Ásirese aýyl sharýashylyǵy eńbekkerleriniń mártebesin arttyrý óte mańyzdy. Qala turǵyndaryn kommersııalyq ústeme baǵasyz azyq-túlik taýarlarymen qamtamasyz etý úshin megapolısterde, monoqalalarda, oblys jáne aýdan ortalyqtarynda tutyný qoǵamdary men kooperatıvter jelisin qurý jáne damytý josparlanǵan», dedi Nıkolaı Arsıýtın.