Qurylys qarqyny báseńsimeıtin bas qalada turǵyndarǵa barynsha qolaıly jaǵdaı jasaýǵa basa mán berilip keledi. Osy baǵyttaǵy jumystardyń qatarynda jańadan salynatyn ekoparkti erekshe atap ótýge bolady. Buǵan qosa jańa sport nysandary men taǵy bir Oqýshylar saraıy boı kótermek.
Keıingi jyldary saıabaq klasterine basymdyq berilip jatqan Astanada jańa qurylys nysany qolǵa alynady. Bul – Kishi Taldykól aýmaǵynda qurylatyn ekopark. Ekoparktiń jalpy aýmaǵy 70 gektardan asady. Ekopark jobasy Kishi Taldykólde sý balansyn saqtaı otyryp, qala turǵyndaryna arnalǵan tabıǵı-rekreasııalyq aımaq qurýdy kózdeıdi.
Qazir jobanyń vedomstvodan tys saraptamasynyń oń qorytyndysy alyndy. Qurylys-montaj jumysyna merdigerlik uıymdy anyqtaý boıynsha konkýrstyq rásimder júrgizilýde. Bul aýmaqta ekopark salý qala turǵyndary men jaqyn mańdaǵy úılerdiń turǵyndaryna demalýǵa jáne tabıǵat aıasynda serýendeýge múmkindik beredi. Sol sııaqty jasyl jelek boıynda jaıaý júrginshilerge arnalǵan ınfraqurylym salynady, oǵan qum-qıyrshyq tas qospasyn paıdalaný josparlanyp otyr. Saıabaqtyń dızaıny men onyń elementterine erekshe mán beriledi. Qorshaǵan ortaǵa zııany tımeıtin tabıǵı materıaldar paıdalanylady, al bul ekoýrbanızm sıpatyna saı keledi.
Abattandyrý barysynda tabıǵı jaǵdaılarǵa, oıyn alańdaryna jáne tabıǵı materıaldardan jasalǵan shaǵyn sáýlet nysandaryna kóńil bólinedi. 12 myńnan asa iri aǵash pen jasyl jelek otyrǵyzý josparlanyp otyr.
Buǵan qosa Kishi Taldykóldiń irgeles aýmaǵy ıgeriledi. Onda áleýmettik nysandar – mektepter, medısınalyq ortalyq, turǵyn úıler, balabaqsha ornalasady.
Al Taldykólde ekologııalyq ınfraqurylym máselesine nazar aýdarylady. Úlken Taldykól janynda qoryq jáne orman-saıabaq aımaǵy bar eldegi alǵashqy tabıǵı park ashylady.
Sonymen qatar Astana qalasynyń ákimi Altaı Kólginov sport nysandarynyń qurylysy men sol jaǵalaýda salynatyn taǵy bir Oqýshylar saraıy týraly habardar etti.
«Elordada balalar men qala turǵyndaryna arnalǵan birqatar sport jáne demalys ortalyǵyn salyp jatyrmyz. Mysaly, Almaty aýdanynda («Qazaqstan» sport saraıy janynda) jeke ınvestısııalar esebinen kópfýnksıonaldy balalar men jasóspirimderge arnalǵan sport ortalyǵynyń qurylysy júrip jatyr. Sport ortalyǵynyń bazasynda fýtbol alańdary, sol sııaqty ústel tennısine, dzıýdoǵa, paradzıýdoǵa, horeografııaǵa arnalǵan zaldar bolady. Sondaı-aq atalǵan kópfýnksıonaldy sport ortalyǵynyń bazasynda sportshylardy ońaltýǵa arnalǵan dárigerlik-dene shynyqtyrý dıspanseri bolady. Al jeke ınvestısııalar somasy 5,5 mlrd teńge. Sport ortalyǵyn 2023 jyly ashý josparlanyp otyr. Buǵan qosa jeke ınvestısııalar esebinen ústel tennısi ortalyǵyn («Alaý» muz saraıynyń janynda) ashamyz», dedi ákim.
Al jańa Oqýshylar saraıy Esil aýdanyndaǵy Turan dańǵylynan oryn tebedi. Bunyń qurylysy da jeke ınvestısııalar esebinen júrip jatyr. Oqýshylar saraıynyń jalpy aýdany shamamen 6,5 myń sharshy metrdi quraıdy. Onyń bazasynda basseın, gımnastıka, sporttyq-bal bıleri zaldaryn, shahmat, robottehnıka jáne IT-baǵdarlamalaý kabınetterin ashý josparlanyp otyr.
«Oń jaǵalaýda Oqýshylar saraıy bar. Qala turǵyndarynyń ótinishi boıynsha sol jaǵalaýda Oqýshylar saraıyna arnalǵan oryn bólindi. 2023 jyly Oqýshylar saraıyn ashýdy josparlap otyrmyz. Sol sııaqty boks, jekpe-jek óneri ortalyqtary, jekpe-jek zaly, sportshylarǵa arnalǵan medısınalyq ortalyq (A-82 kóshesindegi «Nurly Jol» temirjol vokzalynyń janynda) ashyldy. Jastar saraıynda, «Tolqyn» SK jáne t.b. jóndeý jumysy júrgizildi. «Qazaqstan» sport kesheninde qaıta qurý jáne jańǵyrtý jumysy júrip jatyr. «О́ndiris» jáne «Kóktal-2» eldi mekenderinde dene shynyqtyrý-saýyqtyrý keshenderi ashyldy. Olarda sporttyń 10 túri boıynsha 1 myńǵa jýyq bala jattyǵady. Taǵy eki eldi mekende dene shynyqtyrý-saýyqtyrý keshenderiniń qurylysy júrgizilýde. Qala turǵyndarynyń sportpen shuǵyldanyp, bos ýaqytyn paıdaly ótkize alýy úshin sport jáne demalys ortalyqtarynyń jelisin ári qaraı da keńeıtemiz. Sport ortalyqtary buqaralyq sportty damytýǵa jáne balalar men jasóspirimder sportyna qoldaý kórsetýge múmkindik beredi», dedi A.Kólginov.