Birinshi bolyp 125 ball jınady

2 maýsymda ótken Ulttyq biryńǵaı testileýdiń birinshi kúniniń qorytyndysy boıynsha Almaty kósh bastap tur. Mundaǵy  fızıka-matematıka pánderin tereńdete oqytatyn №178 lıseı túlegi, «Altyn belgi» úmitkeri Aıǵa­nym Ábdijappar  Ulttyq testileý ortalyǵy taratqan aqparat boıynsha  eń joǵary kórsetkish – 125 baldy ıe­lendi.  2012 jyldyń 1 jeltoqsanynda – Qazaqstan Respýblıkasynyń Tuńǵysh Prezıdenti kúnine oraı ashylǵan lıseıdiń dırektory, «Qurmet» ordeniniń ıegeri Ábdimájıt О́tesh: «Bıylǵy oqý jylynda osy bilim uıasyn bitirgen 109 túlektiń ishinde 22 halyqaralyq ǵylymı jobalar jarystarynyń, halyqaralyq konkýrstardyń qatysýshylary men jeńimpazdary, 21 «Altyn belgi» ıegeri, 15 erekshe úlgidegi attestat ıegerleri ózderine artqan senimdi aqtaı bildi. Mekteptiń UBT qorytyndysy boıynsha orta ball 105,8 boldy», – dedi. Test tapsyrýshylardyń arasynda alǵashqy bolyp «Altyn bel­gisin» eń joǵary ballmen aıaq­taǵan A.Ábdijappardy qut­tyqtap, birneshe saýal qoıdyq. – UBT suraqtary qıyn boldy ma? – Ártúrli, kúrdeli de, qara­paıym da suraqtar boldy. – Tańdaǵan pániń? – Geografııa – Qaı pánge kóp ýaqyt ketti? – Matematıkaǵa – Bolashaqta kim bolǵyń keledi? – Qarjy salasynyń mamany bolsam deımin. – Shetelge oqýǵa barasyń ba? – Joq. Qazaqstan ýnıver­sıtet­terinde-aq bilim alǵym keledi. – 125 ball alǵanyńa tańǵaldyń ba? – Qalaı desem eken... Men ózime ózim senimdi boldym. О́ıtkeni, al­dyn ala ótken synaqtarda joǵa­ry kórsetkishke qol jetkizip júrgenmin. – Bilim alǵan mektebińe rıza shyǵarsyń? – Iá, bizdiń lıseı fızıka-matematıka pánderin tereńdete oqytady ǵoı. Osynda oqımyn degen úmitkerler óte kóp. Aınash ESALI, «Egemen Qazaqstan». ALMATY.