О́skemende Premer-Mınıstr Álıhan Smaıylov pen Prezıdent Ákimshiliginiń Basshysy Murat Nurtileý Shyǵys Qazaqstan oblysynyń barlyq deńgeıdegi máslıhattar depýtattarynyń jınalysyna qatysty.
Á.Smaıylov Memleket basshysynyń óńir ákimi laýazymyna Danıal Kenjetaıuly Ahmetov pen Renat Tileýhanuly Qurmambaevtyń kandıdatýralaryn qaraýǵa engizý týraly hatyn oqydy.
Ashyq daýys berý qorytyndysy boıynsha 117 depýtattyń 94-i D.Ahmetovke, 23 depýtat R.Qurmambaevqa daýys berdi.
Oblys aktıvimen kezdesýde Premer-Mınıstr óńirde Danıal Ahmetov jumys istegen kezeńde iri ónerkásiptik jáne aýyl sharýashylyǵy jobalary iske asyrylǵanyn atap ótti. Áleýmettik maqsattaǵy ondaǵan nysan, onyń ishinde mektepter, aýrýhanalar, sport ortalyqtary salynyp, qurylys jumystary júrýde. Jalpy alǵanda, Shyǵys Qazaqstan oblysy búginde barlyq negizgi ekonomıkalyq kórsetkishter boıynsha oń nátıjege jetip otyr.
Á.Smaıylov basym mindetter retinde Prezıdenttiń saılaýaldy baǵdarlamasyn oryndaý jónindegi is-sharalar jospary sheńberinde óńirdi odan ári damytý jónindegi júıeli sharalardy iske asyrý ekenin atap ótti.
«Bul qujatta ekonomıkada, áleýmettik salada jáne óńirlik saıasatta halyqtyń ómir súrý deńgeıi men ál-aýqatyn arttyrýǵa baǵyttalǵan naqty ózgerister qarastyrylǵan», dedi Premer-Mınıstr.
Onyń aıtýynsha, aldaǵy jyldary ulttyq jobalar aıasynda 4,2 myń oqýshyǵa arnalǵan 10 jańa mektep, 36 alǵashqy medısınalyq-sanıtarlyq kómek nysandaryn ashyp, 1 aýdandyq aýrýhanany jańǵyrtý josparlanýda. Budan basqa, aýyldyq eldi mekenderde agrarlyq sektordy, kásipkerlikti damytý jáne jalpy aýylda ómir súrý sapasyn arttyrý jóninde sharalar qabyldanady.
Sonymen qatar Premer-Mınıstr jylytý maýsymyn turaqty ótkizý, turǵyn úı-kommýnaldyq ınfraqurylymdy jańǵyrtý, metallýrgııa jáne mashına jasaý salalaryn damytý jónindegi qadamdardy iske asyrý, sondaı-aq ekologııalyq ahýaldy jaqsartý qajettigine nazar aýdardy.