ASTANA. 5 maýsym. Pavlodar oblysynda 3 aýdanǵa jańa ákim taǵaıyndaldy. Bul týraly «QazAqparat» habarlady.
Prezıdent ákimshiliginiń kelisimimen, Pavlodar oblysynyń ákimi Qanat Bozymbaevtyń qaýlysymen Aqsý qalalyq máslıhatynyń kezekten sessııasynyń barysynda Aqsý qalasynyń jańa ákimi bolyp Qaırat Núkenov bekitildi.
Qaırat Temirshotuly 1970 jyldyń 15 qyrkúıeginde Palodar oblysy Jelezınskıı aýdanynyń Zaharovka aýylynda týǵan. Joǵary bilimdi. Sibir memlekettik avtomobıl-jol akademııasyn, P.A.Stolypın atyndaǵy Omby memlekettik agrarlyq ýnıversıtetin bitirgen, mamandyǵy – ekonomıst jáne ǵalym-agronom.
Q.Núkenov eńbek jolyn Jelezınskıı aýdanynyń «Jelezınskıı» keńsharynyń №2 bóliminde jumysshy bolyp bastaǵan. 1992 jyldan shaǵyn jáne orta bıznes kásiporyndaryna jetekshilik etken. 2012 jyly Pavlodar oblysy Jelezınskıı aýdanynyń ákimi boldy. Al osy taǵaıyndaýǵa deıin Pavlodar oblysynyń kásipkerlik, saýda jáne týrızm basqarmasyn basqaryp keldi.
Sonymen birge, Pavlodar oblysy Maı jáne Aqtoǵaı aýdandaryna da jańa ákimder taǵaıyndaldy.
Maı aýdanyna Begzııa Zeınollaqyzy Ysqaqova ákim bolyp bekitildi.
Begzııa Zeınollaqyzy 1961 jyly 4 aqpanda Reseı Federasııasy Novovarshavskıı aýdanynyń Ermak aýylynda týǵan. 1985 jyly Pavlodar pedagogıkalyq ınstıtýtyn bitirgen. Mamandyǵy – orys tili jáne ádebıeti pániniń muǵalimi.
Eńbek jolyn Pavlodar oblysynyń Krasnoýtskıı mektep-ınternatynyń tárbıeshisi bolyp bastaǵan. 1987-2002 jyldar aralyǵynda muǵalim, mektep dırektorynyń orynbasary, mektep dırektory qyzmetterin atqarǵan. 2002 jyldan memlekettik qyzmette. Ol Aqtoǵaı aýdany ákiminiń orynbasary, Aqtoǵaı aýdanynyń bilim berý bóliminiń bastyǵy boldy. Al osyǵan deıin Aqsý qalasy ákiminiń orynbasary qyzmetin atqaryp keldi.
Sondaı-aq, Aqtoǵaı aýdanynyń ákimi bolyp Serik Barlybaıuly Batyrǵojınov taǵaıyndaldy.
Serik Barlybaıuly 1964 jyly Pavlodar oblysy Ertis aýdanynyń Kotelnıkovo aýylynda týǵan. 1993 jyly agronom mamandyǵy boıynsha Selınograd aýyl sharýashylyǵy ınstıtýtyn, 2004 jyly Qazaq gýmanıtarlyq zań ýnıversıtetin bitirdi.
Eńbek jolyn 1982 jyly Golýbovkıı keńsharynyń №1 bóliminde shopan kómekshisi retinde bastady. Keıin Golýbovkıı keńsharynyń bas agronomy boldy. Sonymen birge, «Belovodskıı HPP» aksıonerlik qoǵamynda, birneshe jaýapkershiligi shekteýli seriktestikte basshylyq qyzmetter atqardy. Odan keıin Qashyr aýdany ákiminiń birinshi orynbasary, aýdandyq aýyl sharýashylyǵy salasynyń basshysy, keıin Qashyr aýdanynyń ákimi boldy. Al osy taǵaıyndaý aldynda Ertis aýdany ákiminiń orynbasary qyzmetin atqardy.
Joldybaı Bazar.
Derekkóz: «QazAqparat».
Foto: egemen.kz.