Germanııanyń Galle qalasynda bokstan dástúrli halyqaralyq týrnırdiń 41-shi kezegi óziniń máresine jetti. Onyń qorytyndysy boıynsha Qazaqstan boksshylary 1 altyn, 3 kúmis medal jeńip aldy.
Fınaldyq jekpe-jekti 49 kıloǵa deıingi salmaqtaǵy kókshetaýlyq Temirtas Júsipov pen koreıalyq Jong Hýn Shın bastady. Onda upaıdy sál de bolsa kóbirek alǵan Seýl boksshysy 2:1 esebimen utyp ketti. Bulardyń ekeýi de Azııa chempıony edi. Atap aıtqanda, Shın 2011 jyly qurlyqtyń myqtysy atansa, Júsipov 2013 jyly sol onyń ornyn basqan bolatyn.
Al 52 kıloǵa deıingi salmaqtaǵy astanalyq Ilııas Súleımenov týrnır jeńimpazdyǵyna uryssyz qol jetkizdi. Sebebi, onyń qarsylasy, moldovan boksshysy Aleksandr Rıskan jekpe-jekke shyqpaı qaldy. Sóıtip, Ilııas qazaqstandyqtar qorjynyna túsken jalǵyz altyn medaldyń ıegeri atandy.
Budan keıin altyn medal úshin aıqasqa túsken aqtaýlyq eki boksshy da ırland atletterinen utylyp, kúmis medaldy qanaǵat tutty. Aıtalyq, 60 kıloǵa deıingi salmaqtaǵy Berik Ábdirahmanov – Devıd Olıver Djoısqa, 81 kılodaǵy Ádilbek Nııazymbetov 2011 jylǵy Eýropa chempıony, 2013 jylǵy álem chempıonatynyń qola júldegeri Djoı Ýardqa 1:2 esebimen ese jiberdi.
Bulardan basqa taǵy eki boksshymyz – Almasbek Álibekov (64 kg) pen Rýstam Svaev (75 kg) ózderiniń birinshi jekpe-jekterinde utylyp, medaldar aýylyna jaqyndaı almady.
Rýslan IGILIK.