Qazaqstan Respýblıkasynyń Tuńǵysh Prezıdenti N.Á.Nazarbaev atyndaǵy Mádenıet jáne demalys saıabaǵynda «Jasyl el» kógaldandyrý jasaqtarynyń X eńbek maýsymynyń ashylýy men joǵary oqý oryndary men tehnıkalyq jáne kásiptik bilim beretin kolledjder men lıseılerdiń stýdentterine oblys ákiminiń bir jolǵy stıpendııasyn tapsyrýǵa arnalǵan «Jastar – bolashaq negizi» atty oblystyq jastar forýmy bolyp ótti. Forýmdy oblys ákimi Arhımed Muhambetov sóz sóılep ashyp, jastardy jańa eńbek maýsymynyń bastalýymen quttyqtady.
Ol Elbasy Nursultan Nazarbaevtyń jyl saıynǵy Qazaqstan halqyna joldaýlarynda jastardyń jaqsy maman, eliniń erteńine jaýapty azamat bolyp shyǵýlaryna úlken úmit artyp, olarǵa barlyq jaǵdaı týǵyzyp otyrǵanyn atap ótti. Bul forým Elbasynyń sarabdal saıasatynyń aıqyn kórinisi ekenin jetkizdi.
– Oblysta da bul baǵytta úlgili úrdister barshylyq. «Jasyl el» kógaldandyrý jasaqtarynyń alǵashqy leginde 300 jas eńbek etip jatyr. Ekinshi lekte taǵy 250 stýdent jazǵy eńbek semestrine qatysady. Keıin bulardyń qataryn stýdenttik qurylys jasaqtarynyń músheleri tolyqtyrady. Olar úshin jumys oryndary daıyndap qoıyldy. Jastardyń jazǵy eńbek semestri qolǵa alynǵan on jylda 50 myń jas óziniń mańdaı ter, aq adal eńbeginiń dámin tatty deýge bolady. Bul jastardy eńbeksúıgishtikke tárbıeleıtin ádemi úrdis, – dep túıindedi sózin óńir basshysy. Sodan keıin stýdentterge stıpendııalardy saltanatty jaǵdaıda tapsyrdy.
Bıylǵy jyly oblys ákiminiń stıpendııasyna oblystyń jáne oqý ornynyń qoǵamdyq ómirine belsene aralasyp, oqýda úzdik kórsetkishterimen erekshelengen talantty da daryndy joǵary oqý oryndarynyń 183 stýdenti jáne tehnıkalyq jáne kásiptik bilim berý oqý oryndarynyń 114 stýdenti ıe boldy. Olardyń árqaısysyna tıisinshe 120 myń jáne 60 myń teńge berildi.
Forýmǵa qatysýshylar oblys ákimimen eskertkish sýretke tústi. Forýmdy uıymdastyrýǵa «Aqtóbe oblysynyń jastar saıasaty máseleleri basqarmasy» MM jáne «Jastarmen jumys jónindegi resýrstyq ortalyǵy» KMM uıytqy boldy.
Satybaldy SÁÝIRBAI,
«Egemen Qazaqstan».
Aqtóbe oblysy.