Keshe Qatardaǵy álem chempıonatynyń alǵashqy jartylaı fınaldyq saıysy ótti. Lýsaıldaǵy 90 myń kórermen syıatyn ulttyq stadıonda ıne shanshar bos oryn bolmady. Barsha jurtty mazalaǵan suraq: «Argentına jeńe me, álde Horvatııa ma?», «Messı myqty ma, álde Modrıch pe?», Mine, osy ispettes saýaldarǵa jaýap alý úshin seısenbiden sársenbige qaraǵan túni jer-jahannyń jankúıerleri kógildir ekranǵa kóz tikti.
Statıstıkalyq málimetterge júginsek, qos komanda buǵan deıin ózara bes márte kezdesken eken. Ekeýi de eki retten jeńiske jetipti. 1998 jyly Fransııadaǵy álem chempıonatynda argentınalyqtardyń asyǵy alshysynan tústi – 1:0. 2018 jylǵy Reseıdegi mýndıalda horvattar qarsylas qaqpasyna jaýapsyz úsh gol saldy – 3:0. 2006 jyly ótken joldastyq kezdesýde qart qurlyqtyń ókilderi (3:2) basymdyq tanytsa, 2014 jyly Ońtústik Amerıkadan kelgen oǵylandardyń (2:1) aıdarynan jel esti. Al 1996 jyly uıymdastyrylǵan taǵy bir básekede esep ashylǵan joq – 0:0.
Lýsaıldaǵy oıyn óte sylbyr ótti. Qos komanda uzaq ýaqyt boıy ańdasyp, arbasýdan aspady. Sol ýaqyt aralyǵynda ne bir jaqsy kombınasııany, ne bir utymdy shabýyldy kóre almadyq. Osy «kórinis» jarty saǵatqa sozyldy. 32-mınýtta jaǵdaı kúrt ózgerdi. Horvatııa qorǵaýshysy Deıan Lovernniń óreskel qateliginen keıin dop Hýlıan Alvarestiń aıaǵyna tıdi. Ol birden alǵa umtylyp, qaqpashymen betpe-bet qaldy. О́z komandasyn qaýipti jaǵdaıdan qutqarmaq bolǵan Domınık Lıvakovıch Hýlıan Alvaresti teýip qulatty. Tóreshi penaltı belgiledi. Lıonel Messı 11 metrlik núkteden múlt ketken joq – 1:0. Ol azdaı, Danıele Orsato erejeni buzǵan qaqpashymen qosa, tóreshimen sóz talastyrǵan jartylaı qorǵaýshy Mateo Kovachıchke de sary qaǵaz kórsetti.
Odan keıin Horvatııa quramasyn múldem tanymaı qaldyq. Olar jıi-jıi qatelikke boı aldyryp, bilgenderinen jańyldy. Sondaı bir sátti taǵy da Alvares utymdy paıdalandy. 37-mınýtta alańnyń ortasynan quıyndaı júıtkigen ol birneshe oıynshynyń arasynan sytylyp shyǵyp, ekinshi dopty qaqpaǵa toǵytty – 2:0.
Úzilis kezinde jáne ekinshi taım bastalǵan bette Zlatko Dalıch úsh birdeı oıynshysyn almastyryp, oıynǵa ózgeris engizgisi keldi. Borna Sosanyń ornynan Mırslav Orshıch, Marıo Pashalıchtiń ornyna Nıkola Vlashıch jáne Marselo Brozovıchtiń ornyna Brýno Petkovıch shyqty. Biraq odan esh nátıje bolmady. «Baıaǵy jartys – sol jartas» kúıinde qaldy. Horvattar óte baıaý qımyldap, básekeniń basynan aıaǵyna deıin, eń bolmaǵanda, jóni túzý bir shabýyl da uıymdastyra alǵan joq. Argentınalyqtar da keremet bir oıyn kórsetti dep aıtý qıyn. Desek te Lıonel Skalonı komandasynyń esebi túgel edi. Qarsylasynyń unjyrǵasy túsip ketkenin ańǵarǵan olar 69-mınýtta taǵy bir gol soqty. Horvatııa quramasynyń aıyp alańyna oń qaptaldan engen Messı qorǵaýshylar qyspaqqa alǵanyna qaramastan, dál syzyqshaǵa kelgende Alvareske dál pas berdi. 22 jastaǵy Argentınanyń jas juldyzy óz múmkindigin qalt jibermeı, dýbl avtory atandy – 3:0. Odan keıin tablodaǵy esep ózgergen joq.
Osylaısha, Argentına quramasy óz tarıhynda altynshy ret álemdik dop dodasynyń fınalynda óner kórsetedi. Olar 1978 jáne 1986 jyldardaǵy mýndıalda bas júldeni oljalasa, 1930, 1990 jáne 2014 jyldary sheshýshi tusta súringen edi. Endi argentınalyqtardyń úshinshi márte chempıon atanýyna tamasha múmkindik týyndap otyr. Horvatııa fýtbolshylary 17 jeltoqsanda qola medal úshin talasady. Fınal kelesi kúni ótedi. Al bul komandalardyń qarsylastary kim bolatyny Fransııa men Marokko arasyndaǵy báseke barysynda anyqtalady.