Úlken joldyń boıyn jaǵalaı ornalasqan aýyldardyń tirshiligi basqasha bolady ǵoı. Áıteýir úlken joldyń ústindegi halyq saýda-sattyq, alys-beris jasaýǵa epti keledi. «Manat» sharýa qojalyǵynyń jylyjaıy da qurylysy qyzý júrip jatqan «Batys Eýropa – Batys Qytaı» kólik dáliziniń boıynda ornalasqan eken. Iаǵnı, bul sharýashylyqtyń saýdasy qyzatyn kez áli alda degen sóz.
«QazAgroQarjy» AQ-tan nesıege alǵan 96,0 mln. teńgeniń ústine ózderiniń qaltasyndaǵy 24,0 mln. teńgesin qosyp, búginde «Manat» sharýa qojalyǵy 1 gektarǵa jylyjaı ashqan. Gollandııalyq kókónis ósirý tehnologııasy boıynsha qııar men qyzanaq ósiredi. Budan bólek 40 gektar jeri bar. Tamshylatyp sýarý ádisi boıynsha 20 gektar jerge qyzanaq, qaýyn, basqa da kókónister egip otyr. Tipti, sol mańnan arnaıy basseın jasap, egistikke sý jetkizý úshin arnaıy motor qoıypty. Jylyjaıdyń ózinen túsetin tabys jaman emes. Bir metrden 15 kelige deıin kókónis alady. Barlyǵy 20 adamdy jumyspen qamtyp otyr. О́tken jyly osy jylyjaıdan 340 tonna qııar alynypty.
Sonaý 1997 jyly qurylǵan bul qojalyqtyń oıǵa alǵan tirligi kóp. Sonyń biri bıyl 2 gektar jerge ıspan tehnologııasymen kókónis ósiretin eki jylyjaı soǵý. «Joba quny 272 mln. teńgeni quraıdy. «Bıznestiń jol kartasy-2020» baǵdarlamasy aıasynda jylyjaıǵa jalpy quny 11,5 mln. teńgeni quraıtyn elektr jelisi tartylyp, transformator ornatyldy. Odan bólek «Alıans bank» AQ arqyly refrıjeratorlar satyp alýǵa berilgen 30 mln. teńge nesıeniń 50 paıyzy baǵdarlamanyń birinshi baǵyty boıynsha sýbsıdııalandy», deıdi sharýa qojalyǵynyń tóraǵasy Uzaq Manatov.
Jylyjaıdyń kókónis tapshylyǵyn boldyrmaý, baǵany turaqtandyrýda paıdasy kóp. Jalpy alǵanda, Jambyl oblysynda búginde 27,2 gektardy quraıtyn 405 jylyjaı bar. Bular ishki qajettiliktiń 32 paıyzyn qamtyp otyr. Bıyl jylyjaılardy taǵy da 13 gektarǵa arttyrý, al, 2015 jyly jalpy aýmaǵyn 72 gektarǵa jetkizý josparda bar. Sonda ǵana jambyldyqtardyń suranysyn tolyq qanaǵattandyrýǵa bolady. Sondaı-aq, maýsymaralyq kezeńderde jemis-kókónis ónimderine degen qajettilikti tolyq qamtý úshin syıymdylyǵy 67,5 myń tonnany quraıtyn qoımalar qajet. Bul másele de arnaıy baǵdarlama boıynsha 2016 jylǵa deıin sheshimin tabady.
Oralhan DÁÝIT,
«Egemen Qazaqstan».
Jambyl oblysy.
Sýretti túsirgen
Aqádil RYSMAHAN.