Búginde osy ata-tegi atalsa, aldymen London Olımpıadasynyń bokstan chempıony Serik Sápıevtiń esimi eske túsetindigi aıan. Abaı qalasynyń baıyrǵy turǵyny, uzaq jyldar shahtada eńbek etken Jumanǵalı Dáýituly men tórt balanyń anasy Irına Fomınıchna shańyraǵy jaqynda taǵy bir shattyqqa bólenip qaldy. Bıyl elimizde tuńǵysh ret ótkizilip otyrǵan «Mereıli otbasy» jalpyulttyq baıqaýy oblystyq kezeńinde Sápıevter áýleti jeńimpaz atandy.
Byltyr Elbasynyń Jarlyǵymen bekitilgen «Otbasy kúni» jańa merekesi aıasynda uıymdastyrylǵan sharaǵa óńirdiń qalalary men aýdandarynda júrgizilgen irikteýge úlgili 108 otbasy tartylyp, 38-i márege shyqqan bolatyn. Bulardyń ishinen baıqaý qorytyndysynda 3-shi jáne 2-shi oryndardy Shahtınsk qalasynyń kenshisi, «Shahter dańqy» ordeni úsh dárejesiniń tolyq ıegeri Qapqaev pen Osakarov aýdanynyń eńbekkeri Koshevestiń otbasy ıelense, eń úzdik retinde Sápıevter shańyraǵy tanyldy.
Kenshiler mádenıet saraıynda aımaqtaǵy ónegeli otbasylardy marapattaýda oblys ákimi ár otbasy ar men qýanyshtyń, tilek pen úmittiń uıasy, onyń birligi – el birligi ekenin, memlekettik qamqorlyq pen qoldaý arqasynda shańyraqtar beriktigi bıikteı túsýin atap, osynaý úlgini kórsetýshilerge baqytty turmys, yntymaq berekesin tiledi.
Sápıevter áýletiniń kenjesi, el maqtanyshy Serik Sápıev ózi de úlgili otbasy tiregi. Úshinshi balaǵa aıaǵy aýyr qosaǵy Móldirmen birge qyzdary Aqqý men Alýany ósirip keledi.
Aıqyn NESIPBAI,
«Egemen Qazaqstan».
QARAǴANDY.