Muratbekov murasy

Elordadaǵy Ulttyq akade­mııalyq kitaphana men kitaphanalar qaýymdastyǵynyń bastamasymen 2007 jyldan beri elimizde ıgi dástúrge aınalǵan «Bir el – bir kitap» atty aksııaǵa bıyl kórnekti jazýshy Saıyn Muratbekov shyǵarmasy arqaý boldy. Osyǵan oraı qalamger dúnıege kelgen Jetisý jerinde «Saıyn dalanyń sýretkeri» atty respýblıkalyq kitap kórmesi ótti. Oǵan elimizge tanymal azamattar akademık, professor Ǵarıfolla Esim, jazýshy «Parasat», «Qurmet» ordenderiniń ıegeri – Beksultan Nurjekeuly, «Qazaq ádebıeti» gazetiniń bas redaktory, Qazaqstannyń eńbek sińirgen qaıratkeri Jumabaı Shashtaıuly, Almaty oblysy ákiminiń orynbasary Serik Muqanov qatysty. Sonymen, jastarǵa patrıottyq tárbıe berý, kitap oqýǵa degen qumarlyqtaryn oıatyp, damytýdy maqsat etken ıgi shara Taldyqorǵanda bastalyp «Jýsan ısi», «Basynda Úshqaranyń...» atty týyndylaryn tanystyrý jazýshy Saıyn Muratbekovtiń týǵan jeri Qońyr aýylynda ádemi jalǵasty. «Sońǵy 15-20 jylda jas­tar kitap oqýdan alshaqtap bara­dy. Bul shara sol olqylyqty toltyra ma dep jasalǵan qadam. Shyny kerek, osydan 8 jyl buryn Abaıdyń «Qara sózderinen» bastalǵan shara aıasynda alǵash 400-ge jýyq túrli deńgeıdegi basqosý bolsa, byltyrǵy jy­ly­ Farıza Ońǵarsynovanyń «Daýa»­ atty kitabyna arnalǵan 2000-nan astam shara ótipti. Bıyl da Saıyn Muratbekovtiń de kita­byn oqýǵa myńdaǵan adam qatysady dep oılaımyn. Osynyń barlyǵy jastardyń kitap oqýǵa degen qulshynysyn oıatý», dedi Almatydaǵy Ulttyq kitaphana bas dırektory Álibek Asqar. «Jyl avtory atanǵan jer­lesimiz Saıyn Muratbekovtiń qos kitaby Jetisý jerindegi bar­lyq kitaphanalarǵa jetkizilip, jastardyń kez kelgen ýaqytta alyp oqýlaryna bolady. Sóz reti kelgende aıtarymyz, Almaty oblysynyń ákimi Ańsar Musahanovtyń qoldaýymen jetisýlyq 200-den astam aqyn-jazýshylardyń kitaptary jaryq kórgen edi. Osy qundylyqty kórgen zııaly qaýym shyn rıza boldy. Endi, mine, Saıyn Muratbekovtiń taǵy eki kitaby qosylyp otyr. Bul kitap oqımyn degen jastarǵa jasalǵan jaǵdaı emes pe?», – dedi Almaty oblysynyń mádenıet, muraǵattar jáne qujattama basqarmasynyń basshysy Rahmet Esdáýletov. Nurbol ÁLDIBAEV, «Egemen Qazaqstan». Almaty oblysy.