Sońǵy úsh jylda elordada 300-ge jýyq kóshe salynyp, 140 shaqyrymǵa jýyq jol jóndeldi. 2022 jyly jol tósemin salý jáne jóndeý boıynsha júrgizilgen jumystar týraly onlaın brıfıngte qala ákiminiń orynbasary Nurlan Nurkenov aıtyp berdi, dep habarlaıdy Egemen.kz Astana ákimdiginiń resmı saıtyna silteme jasap.
Búgingi tańda elordadaǵy avtomobıl joldarynyń jalpy uzyndyǵy 868,3 km, 803,7 km nemese 92,6% asfaltbeton jabyny bar.
Spıkerdiń aıtýynsha, sońǵy úsh jylda qalada uzyndyǵy 165 km bolatyn 300-ge jýyq kóshe salynyp, 140 km-ge jýyq jol jóndelgen.
Sonymen qatar turǵyn úı alaptaryn damytý josparyna sáıkes sońǵy 4 jylda uzyndyǵy 84,4 km 250 kóshe asfaslttaldy.
«Búgingi tańda qalanyń jol-kólik ınfraqurylymy 60 kópir men qurylystan turady. Onyń ishinde 23 úlken jáne kishi kópir, 6 jaıaý kópir, 9 ótkel, 8 kólik aıyrbasy, 10 jerasty jaıaý júrginshiler ótkeli jáne 4 jer ústi jaıaý júrginshiler ótkeli bar. Bıylǵy jyly Uly Dala dańǵylynda kópir ashyldy, ol irgeles magıstraldyq kóshelerdi ishinara túsirýge múmkindik berdi, jańa «Nurly jol» vokzalynyń, Telman jáne Promyshlennyı turǵyn alaptarynyń qoljetimdiligin arttyrdy», dedi Nurkenov.
Sonymen qatar bıyl A62 kóshesi boıynsha A91 (Qordaı) kóshesinen Astana-Qaraǵandy tasjolyna deıingi ýchaskede qozǵalys ashyldy. Osylaısha, Qaraǵandy tasjoly men «Nurly Jol» temirjol vokzaly men qalanyń sol jaǵalaýy arasynda kólik qatynasy qamtamasyz etildi. Bul sharalar Nájimedenov pen Baıtursynov kóshelerin túsirýge múmkindik berdi. Sondaı-aq tranzıttik kóliktiń bir bóligi Qoshqarbaev dańǵylynan, Aınakól kóshesinen, Abylaıhan dańǵylynan jáne Qobda kóshesinen jáne t. b. ketedi.
«2023 jyly jol-kólik ınfraqurylymyn damytý, atap aıtqanda uzyndyǵy 50 km-den asatyn jańa kósheler salý, qazirgi joldardyń jaı-kúıin qoldaý, sondaı-aq Esil ózeni arqyly Táýelsizdik dańǵylynda jańa avtomobıl kópirin ashý boıynsha odan ári jumys josparlanýda. Bul kópir Táýelsizdik dańǵylynyń, jańa temirjol vokzaly, Áziret Sultan meshiti aýdandarynyń sol jaǵalaýmen qosymsha baılanysyn qamtamasyz etýge múmkindik beredi», dep qorytyndylady ákimniń orynbasary.