ASTANA. Maýsymnyń 7-si kúni túnde Ázerbaıjan astanasy – Baký qalasynda Búkilálemdik boks serııasynyń fınaldyq matchtary aıaqtalyp, onyń qorytyndysynda Kýbanyń Cuba Domadores komandasy bas báıgeni jeńip aldy. Bul týraly VKontakte áleýmettik jelisiniń deregine súıengen egemen.kz tilshisi habarlady.
Bıyl tórtinshi márte márege jetip jatqan serııanyń fınalynda Ázerbaıjannyń Azerbaijan Baku jáne Kýbanyń Cuba Domadores jasaqtary kezdesti. Olardyń 6 maýsym kúni ótken birinshi kezdesýlerinde kýbalyqtar 3:2 esebimen jeńiske jetti. Onda 49 kılolyq kýbalyq Iosvanı Veıtıa – ázerbaıjan Hamza Nametovti, 75 kılolyq Arlen Lopes – Haıbýla Mýsalovty, 91 kılolyq Erıslandı Savon Abdýlkadyr Abdýllaevty 3:0 etip jeńse, Baký komandasyndaǵy 56 kılolyq reseılik legıoner Magomed Kýrbanov – kýbalyq Norlan Ierany 3:0, 64 kılolyq Gaıbatýlla Hadjıalıev Iаsnıer Toledo Lopesti 2:1 esebimen utty.
Al kelesi, 7 maýsym kúngi match ta tap osyndaı esep tirkeldi. Biraq onda bakýlikter utysqa ıe boldy. Olardyń arasynda 52 kılolyq Elvın Mamıshzade – Jerardo Kervantesti 3:0, 60 kılolyq Albert Selımov – Lazaro Alvaresti, 91 kılodan aýyr salmaqtaǵy Arslanbek Mahmýdov qarsylasy Djoıs Lardýetti 2:1 etip tize búktirdi. Kýbalyqtar sapynan 69 kılodaǵy Rosnıel Iglesıas – belarýstik Magomed Nýrýtdınovti, 81 kılodaǵy Hýlıo Sezar de la Krýs taǵy bir Belarýs azamaty Mıhaıl Dovgolıanesti 3:0 etip utyp shyqty. Sóıtip, eki kezdesýdiń qorytyndysynda esep teńesti – 5:5!
Sondyqtan qosymsha altynsha jekpe-jekke kezek keldi. Onda 69 kıloǵa deıingi salmaqtaǵy kýbalyq Arıspoıd Despaın men kelesi belorýs Evgenıı Romashkevıch synǵa tústi. Urys Bostandyq araly ókiliniń tolyq jeńisimen (3:0) bitti. Osynyń nátıjesinde bul kúnniń esebi 3:3-ke toqtady. Bul Cuba Domadores komandasynyń bas báıgege qol jetkizýin qamtamasyz etti.
Damır Qojamqul.
Derekkóz: VKontakte.
Foto: VKontakte.