Halyqaralyq áýejaıǵa shabýyl jasaldy

Álem jańalyqtary

Dúısenbige qaraǵan túni Pákistannyń Karachıdegi «Djınna» halyqaralyq áýejaıyna qarýly sodyrlar shabýyl jasady. Shabýyl saldarynan kem degende 23 adam mert bolǵan. Jergilikti basylymdardyń ishki ister organdary basshylyǵynyń málimetterine silteme jasaı otyryp habarlaýynsha, qurban bolǵandardyń arasynda áýejaı qaýipsizdik kúshteri men áýejaı qyzmetkerleri de bar. Sodyrlardyń shabýylyna toıtarys berý kezinde ondaǵan sodyrdyń kózi joıylǵan jáne olardan qarýlar men granatometter alynǵan. Qarýly top áýejaıdyń eki termınalyna shabýyl jasapty. Aldymen sodyrlar áýejaıdyń ǵımaratyna qol granatalaryn laqtyrǵan, sondaı-aq, atys qarýlarynan oq jaýdyrǵan. Shabýyldaýshylardyń arasynda jankeshtiler de bolǵan, solardyń biri bombany iske qosyp, ózin-ózi jaryp jibergen. Áýejaıda barlyǵy úsh márte kúshti jarylys jasaldy degen málimet bar. Atys bes saǵatqa sozylǵan sııaqty. Bul terrorlyq áreketti sýnnıttik sodyrlar jasaýy múmkin degen boljam aıtylýda. Elý myńǵa jýyq adam zardap shekti Brazılııanyń Parana shtatynyń turǵyndary nóser jaýyn sońy alapat tasqynǵa ulasýynan qatty zardap shekti. Sońǵy derekterge qaraǵanda, tasqyn onǵa jýyq adamnyń ómirin jalmaǵan. Parana shtaty úkimetiniń málimdeýinshe, sý basýdan shtattyń ortalyq bóliginde turatyn 50 myńǵa jýyq adam zardap shekken. Tasqyn sý, sondaı-aq, fýtboldan álem birinshiligi ótetin qalalardyń biri – Kýrıtıbany da basyp otyr. Shtat gýbernatory Beto Rıchanyń aıtýynsha, tabıǵat apaty 70 mýnısıpalıtetti qamtyǵan. Kýrıtıbada «Arena Baıshad» stadıony ornalasqan. Bul stadıonda 16 maýsymda Iran men Nıgerııa ulttyq quramalarynyń kezdesýi ótedi eken. Parlamenttik saılaý ótti Jeksenbi kúni Ońtústik  Osetııada parlamenttik saılaý ótti. Ortalyq saılaý komıssııasynyń tóraıymy Bella Plıeva komıssııa parlamenttik saılaýdyń ótkenin tanydy dep málimdedi. Sonymen qatar, ol Ortalyq saılaý komıssııasyna daýys berý kezinde saılaý zańnamasynyń óreskel buzylǵany jóninde aqparattar túspegenin aıtqan. Reseıden baıqaýshy retinde qatysqan baıqaýshylar da saılaýda tártip buzýshylyq tirkelmegenin bildiripti. Al óz kezeginde Eýrokomıssııa daýys berý qorytyndysyn tanymaımyz dep málimdedi. Saılaýǵa toǵyz partııa qatysty. Ońtústik Osetııanyń parlamenti 34 depýtattan turady. Ekzıt-poldyń málimetteri boıynsha «Edınaıa Osetııa» partııasy kóp oryn alǵan kórinedi. Qysqa qaıyryp aıtqanda: * Úndistandaǵy ınjenerlik kolledjiniń 24 stýdenti sý tolqyny basýy saldarynan Bıas ózenine batyp ketti. Izdestirý jumystary júrgizilýde. * Gınnestiń rekordtar kitabyna álemdegi eń qart adam retinde engizilgen Aleksandr Imıch Nıý-Iorkte qaıtys boldy. Qarııa 111 jyl ómir súrgen eken. * Lıvııanyń joǵarǵy soty eldiń premer-mınıstri bolyp jaqynda ǵana saılanǵan Ahmed Maıtygty konstıtýsııaǵa sáıkes saılanbaǵan dep tapty. Ol daýys berý kezinde qajetti daýys jınaı almapty. Bul el zańyna qaıshy keledi. * Shvesııanyń Helsınborg teńiz portyna jaqyn mańda júk kemesi jerge otyryp qalǵan. Sóıtse, onyń kapıtany ýdaı mas eken. Qylmystyq is qozǵaýdy talap etti Reseı Memlekettik dýmasynyń birqatar depýtattary «Rosnano» basshysy Anatolıı Chýbaısqa jáne osy memlekettik korporasııanyń basqa da menedjerlerine qarsy qylmystyq ister qozǵaýdy talap etti. «Izvestııa» basylymynyń jazýyna qaraǵanda, birqatar depýtattar «Rosnano» korporasııasynyń jumysynda Reseı qylmystyq kodeksinde kózdelgen toǵyzǵa jýyq qylmystyń belgileri bar degen pikir bildirgen. Osyǵan baılanysty Memdýmanyń bıýdjet jáne salyq jónindegi komıteti tóraǵasynyń orynbasary Oksana Dmıtrıeva Reseıdiń bas prokýrory Iýrıı Chaıkaǵa korporasııanyń qyzmetine muqııat tekserý júrgizý týraly saýal joldaǵan jáne ol odan bul máseleni jeke óziniń baqylaýyna alýdy ótingen. Depýtattar «Rosnano» qyzmetine 2011 jyldan beri «qyzyǵýshylyq» tanyta bastapty. AQSh pen Iran ymyraǵa kelmek Osy aptada AQSh pen Iran birneshe onjyldyqtan soń, alǵash ret Tehrannyń ıadrolyq baǵdarlamasy boıynsha tike kelissóz ótkizedi. Bul aqparatty Iran syrtqy ister mınıstriniń orynbasary Abbas Arakchı rastady. Arakchıdiń aıtýynsha, ırandyq delegasııaǵa onyń ózi jetekshilik etedi. Búgin jáne erteń Jenevada olar AQSh dıplomattarymen júzdesetin bolady. Kelissózge AQSh tarapynan Memlekettik hatshynyń orynbasary Ýılıam Berns basshylyq jasaıdy. Odan keıingi Rımdegi eki kún Iran dıplomattarynyń reseılik tarappen kezdesý ótkizýine arnalady. Al Irannyń halyqaralyq araaǵaıyndyq tanytýshy «altylyqpen» kezdesýi 16 maýsymǵa jos­parlanyp otyr. Bul kezdesýler men kelissózderdiń basty maqsaty – Tehrannyń ıadrolyq jobalaryna tosqaýyl qoıý. Taǵy bir sheneýnikke aıyp taǵyldy Qytaıdyń asa iri «China COSCO» logıstıkalyq holdınginiń burynǵy basshysy Sıýı Mınszege sybaılas jemqorlyqqa jol berdi degen aıyp taǵyldy. Bul jóninde «Reıter» agenttigi habarlady. Qytaı kompartııasynyń tártipti tekserý jónindegi ortalyq komıssııasy ony birneshe kún buryn partııa qatarynan shyǵarǵanyn da málimdegen. S.Mınszege óz qyzmetin asyra paıdalandy jáne memleket qarajatyn jeke bas múddesine jumsady degen kúdik keltirilip otyr. Ol osydan jarty jyldaı buryn holdıngtiń atqarýshy dırektory qyzmetinen otstavkaǵa jiberilgen bolatyn. Atalǵan holdıngte 130 myńnan astam adam jumys isteıdi. Internet materıaldary negizinde ázirlendi.