Senator Lázzat Rysbekova Batys Qazaqstan oblysynyń turǵyndarymen, densaýlyq saqtaý salasy qyzmetkerlerimen jáne oblystyq máslıhat depýtattarymen kezdesti.
Depýtat Terekti aýdanyndaǵy jumys istep turǵan aýdandyq emhananyń jaǵdaıymen tanysty. Ondaǵy jabdyqtar túgelimen tozǵan, al ǵımarattyń ózi 50-jyldary salynǵan jáne qazir jóndeý men jańartýdy qajet etetini týraly habardar boldy. Senator medısınalyq mekemeniń jańa ǵımaratyn salýǵa qarajat bólý máselesin respýblıkalyq deńgeıde kóterý jóninde nıeti bar ekenin atap ótti.
«Qalyptasqan jaǵdaıdy eskere otyryp, jańa áleýmettik nysandar qurylysyn salý jáne respýblıkalyq bıýdjetten nysanaly transfert túrinde qarjylandyrý máselelerin sheshýge járdemdesý qajet», dep atap ótti Lázzat Rysbekova.
Senator sondaı-aq oblystyq máslıhat depýtattarymen kezdesýde arnaıy áleýmettik qyzmetter kórsetý mekemesine jańa ǵımarat, Terekti jáne Báıterek aýdandarynda birkelki órt sóndirý depolaryn salý máselelerin talqylady. Senator sonymen qatar depýtattarmen birlesip kezekte turǵandardy turǵyn úımen qamtamasyz etýge qatysty máselelerdi de talqylady.
Lázzat Rysbekova oblys ákimi Narıman Tóreǵalıevpen kezdesý barysynda jergilikti turǵyndardyń áleýmettik ál-aýqatyna qatysty máselelerdi sheshýge erekshe nazar aýdardy.
Sonymen qatar Senat depýtattary Serikbaı Trumov pen Súıindik Aldashev Mańǵystaý oblysynyń Munaıly aýdanynda boldy. Senatorlar Mańǵystaý aýylyn elektr qýatymen qamtamasyz etý jumysynyń barysymen, sondaı-aq Qyzyltóbe aýyldyq okrýginde 1200 oryndyq gaz qubyry men mektep qurylysymen tanysty.
Memlekettik mektep qurylysynyń salynýy úsh aýysymdyq oqytý máselesin jeńildetýge kómektesedi. Jumys jospar boıynsha 2024 jyly aıaqtalýǵa tıis.
«Memleket «Jaıly mektep» jobasyn ázirlegen bolatyn. Bul joba mektepterdiń jetispeýshiligin tolyǵymen sheshetin bolady. Sondyqtan qurylys merzimderin saqtaý jáne jumystyń joǵary sapasyn saqtaý asa mańyzdy. Osyǵan baılanysty jergilikti ákimdik pen tıisti memlekettik organdar tarapynan osy mekteptiń qurylys barysyna qatań baqylaýdy qamtamasyz etýdiń erekshe mańyzy bar», dep atap ótti senator Serikbaı Trumov.
Senatorlar Aqtaý qalasyndaǵy «Qazatomónerkásip – MAEK» JShS mekemesi men «Kaspıı» sý tushytý zaýytynyń jumystarymen tanysty.