EKSPO týy qolymyzda

Adamzat aqyl-oıynyń tamasha tabystarynyń biri – Búkilálemdik jetistikter kórmesin uıymdastyrýdyń 160 jyldan astam tarıhynda Ortalyq Azııa aımaǵy, tipti, TMD elderiniń eshqaısysynda da halyqaralyq kórme týy jelbirep kórgen emes. Keshe Parıj qalasynda Qazaqstannyń bas qalasy Astana – EKSPO-2017 Búkilálemdik kórmesiniń astanasy retinde resmı jáne túpkilikti túrde tanylyp, Halyqaralyq kórmeler bıýrosy uıymynyń týy Qazaqstanǵa saltanatty túrde tabys etildi. О́rkenıet shoǵyrynda shoqtyǵy bıik Qazaqstannyń jáne elordamyz Astananyń halyqaralyq sahnadaǵy mereıi taǵy da sharyqtady. Keshe, ıaǵnı, 11 maýsymda Parıjde Halyq­aralyq kórmeler bıýrosy Bas assambleıasynyń 155-shi sessııasy óz jumysyn bastaǵan edi. Qalyptasqan dástúr boıynsha osy sessııa­da «Astana-EKSPO-2017» Búkilálemdik kór­mesin resmı túrde taný jáne Halyqaralyq kórmeler bıýrosy uıymynyń týyn 2017 jyly osy jahandyq sharany ótkizetin el – Qazaqstanǵa saltanatty túrde tapsyrý sharasy bolyp ótti. Sóıtip, Batys pen Shy­ǵys órkenıetin jalǵastyrǵan altyn kópir atan­ǵan arý Astanada Halyqaralyq kórmeler bıýrosynyń týy jelbireıtin boldy. Halyqaralyq kórmeler bıýrosy Bas assam­bleıasynyń 155-sessııasynyń jumy­syna elimizdiń Syrtqy ister mınıstri Er­lan Ydyrysov bastaǵan qazaqstandyq aý­qym­dy delegasııa qatysty. Delegasııa qura­mynda EKSPO-2017 halyqaralyq maman­dandyrylǵan kórmesiniń komıssary – Syrtqy ister mınıstriniń birinshi orynbasary Rápil Joshybaev, «Astana-EKSPO-2017» ulttyq kompanııasy» aksıonerlik qoǵamynyń basqarma tóraǵasy Talǵat Ermegııaev jáne elimizdegi álemdik kórmeni ótkizýge jaýapty Úkimettiń laýazymdy tulǵalary qatysty. Halyqaralyq kórmeler bıýrosy Bas assambleıasynyń sessııasyna osy uıymǵa múshe 160 memlekettiń delegasııalary túgeldeı der­lik keldi. Halyqaralyq kórmeler bıýrosy Bas as­sambleıasynyń 155-sessııasynda alǵashqy bolyp Qazaqstan tarapynan Syrtqy ister mınıstri Erlan Ydyrysov sóz sóılep, sessııaǵa qatysýshylarǵa arnalǵan Qazaqstan Respýblıkasynyń Prezıdenti Nursultan Nazarbaevtyń quttyqtaý hatyn oqyp berdi. «Qurmetti Bas hatshy myrza! Qurmetti Assambleıaǵa qatysýshylar! Qazaqstan Respýblıkasy Astanada EKSPO-2017 halyqaralyq mamandandyryl­ǵan kór­mesin ótkizý qurmetine ıe boldy. Kórme TMD keńistiginde birinshi ret ótkiziledi jáne álemdik energetıka sala­syn­daǵy talqylaýlar men ınnovasııalardy tanys­tyrýǵa arnalǵan alańǵa aınalatyn bolady. Astana qalasyndaǵy EKSPO-2017 balama energııa kózderin ázirleýge jáne paıda­lanýǵa aıtarlyqtaı úles qosýǵa shaqy­ratyny, úzdik álemdik tehnologııalardy ta­nys­tyrýǵa múmkindik beretini jáne energe­tıkalyq tıimdi baǵdarlamalardy ilgeriletýge járdem kórsetetini sózsiz. Biz birge neǵurlym ekologııalyq jáne qaýip­siz qorshaǵan orta qurý jolynda jańa sheshimder izdeý úshin búkilálemdik qoǵam­dastyqtyń kúsh-jigerin jumyldyratyn bolamyz. Bizdiń tańdaǵan «Bolashaq energııasy» taqyryby búkil adamzat úshin asa ózekti bolyp tabylady. Qazaqstan – jasyl ekonomıkany engizýdiń belsendi jaqtaýshysy. Osyǵan oraı, biz 2012 jyly Birikken Ulttar Uıymynyń ornyqty damý jónindegi konferensııasymen maquldanǵan HHI ǵa­syr­daǵy Jahandyq energııa-ekologııalyq ornyqty damý strategııasyn jáne «Jasyl kópir» seriktestik baǵdarlamasyn usyndyq. Astanadaǵy Kórme jarqyn halyqaralyq oqıǵalardyń biri bolatynyna, balama jáne jańartylatyn energııa kózderin odan ári qoldanýǵa jáne damytýǵa serpin beretinine senimdimin. Biz EKSPO-2017-ni eń joǵary deńgeıde ótkizý úshin bar kúsh-jigerimizdi salamyz. Barlyq qatysýshylarǵa tabysty jumys pen jetistikter tileımin!» dep atap kórsetilgen Elbasy quttyqtaýynda. Sessııa jumysynyń barysynda «Astana-EKSPO-2017» kórmesi resmı túrde tanyldy. Osyǵan baılanysty, Halyqaralyq kórmeler bıýrosy Bas assambleıasynyń prezıdenti Ferdınand Nagı men Bas hatshysy Vısente Lossertales Qazaqstan Respýblıkasy delegasııasynyń jetekshisi, Syrtqy ister mınıstri Erlan Ydyrysovqa HKB týyn saltanatty túrde tabys etti. Halyqaralyq kórmeler bıýrosynyń 155-sessııasy aıasynda «Astana-EKSPO-2017» UK» AQ basqarma tóraǵasy Talǵat Ermegııaev Fransııanyń birneshe kompanııalarynyń basshylarymen kezdesti. Fransııanyń ulttyq kompanııalary «EKSPO-2017» halyqaralyq mamandandyrylǵan kórmesiniń daıyndyǵy men ótkizý jumystaryna atsalysýǵa yntalylyq tanytyp otyr. Kezdesýde «Morpho» kompanııasynyń Ortalyq Azııa boıynsha kommersııalyq dırektory Fransýa Rotenbýrgerdiń aıtýynsha, bul kompanııa halyqaralyq kórme kezinde qaýipsizdikti saqtaý máseleleri boıynsha sapaly qyzmet kórsetýge múddeli. «Morpho» kompanııasy bul salaǵa mamandanǵan, onyń jahandyq sharalar kezinde qyzmet kórsetý jónindegi tájirıbesi úlken. Máselen, London Olımpıadasy kezinde qaýipsizdikti osy kompanııa qamtamasyz etken bolatyn. Kezdesýde, sonymen birge, gaz, energetıka, ınjenerlik-kommýnaldyq júıeler, aýyzsýmen qamtý, turmystyq qaldyqtardy ıgerý jáne basqa salalar boıynsha mamandanǵan kompanııalardyń jetekshilerimen kelissózder júrgizildi. Halyqaralyq kórmeler bıýrosynyń 155-ses­sııa­synyń jumysy ashylar qarsańda G-Global jáne EKSPO-2017 jobalaryn álemge nasıhattaý maqsatymen saıahattap júrgen qazaqstandyq «Kerýen» motosherýine qatysýshylar Parıjge kelip jetti. VII Astana ekonomıkalyq forýmy ótip jatqanda elordadan shyqqan qazaqstandyq baıkerler toby 8000 shaqyrymǵa jýyq jol júrip, elimiz EKSPO-2017 týyn resmı túrde qabyldaıtyn ýaqytta Fransııa astanasyna keldi. Qazaqstandyq alty baıker elimizden shyǵyp, Reseı, Fınlıandııa, Danııa, Norvegııa, Shvesııa, Germanııa, Belgııa jerlerinen ótken. Olar jol boıy kezdesken jurtty elimizdiń tarıhymen, mádenıetimen tanystyryp, ekonomıkalyq jetistikterimiz ben iri jobalarymyzdy nasıhattady. Motosherý – «Ǵalymdardyń eýrazııalyq ekonomıkalyq klýby» qaýymdastyǵy, «Astana-EKSPO-2017» UK» AQ, Syrtqy ister mınıstrligi, Qazaq geografııalyq qoǵamy jáne «Rompetrol» kásiporny birlesip qolǵa alǵan joba. Astana ekonomıkalyq forýmy kezinde bastalǵan saıahat EKSPO-2017 týy Qazaqstanǵa tapsyrylatyn ýaqytta Parıjde bolsa, shildeniń 6-sy – Astana kúni elge oralmaq. Oǵan deıin Shveısarııa, Italııa, Rýmynııa, Túrkııa, Grýzııa jáne Reseı aýmaǵyndaǵy 10 myń shaqyrymdyq jol bar. – Bizdińshe, motosıklmen saıahattaýda kósh­pen­dilerdiń rýhy bar. О́ıtkeni, zaman, tehnıka ózger­genimen, rýh qalady. Sondyqtan biz jylyna bir ret saıahat uıymdastyryp turamyz. Buǵan deıin Ortalyq Azııa elderine saıahat jasadyq. Ol kezde adamnyń aıaǵy tımegen tabıǵı-tarıhı oryndardy aralasaq, bul joly basty taqyrybymyz – haı-tek. Eń aýqymdy saıahatymyz – osy, – deıdi tájirıbeli baıker ári mýzykant Dıaz Baıseıitov. Sóıtip, Parıj qalasynda HKB Bas assambleıasynyń 155-sessııasynyń jumysy barysynda «Astana-EKSPO-2017» kórmesi resmı túrde tanylyp, Qazaqstanǵa kórme týy tabys etildi. Endi elordamyzda ótetin jahandyq kórmege halyqaralyq qatysýshylardy tartý jáne «Astana-EKSPO-2017»-ni jahandyq aýqymda nasıhattaý sharalary barynsha belsendi júrgiziletin bolady. Astana qalasy Búkilálemdik jetistikter kórmesin ótkizý ortalyǵy retindegi óz jumysyn zańdy túrde bastady. Iske sát! Jylqybaı JAǴYPARULY, «Egemen Qazaqstan».