Qandaı da bir iri jarys bastalar qarsańda tártipsizdigimen kózge túsken jankúıerlerdiń tólqujattaryn jınap alýǵa Ulybrıtanııa quqyq qorǵaý oryndarynda zańǵa negizdelgen múmkindik bar. Iаǵnı, fýtbol oıyndary kezinde buzaqylyq áreketter jasap, sonyń saldarynan isti bolǵandar óz erikterimen polısııaǵa tólqujattaryn tapsyrýy tıis. Zań talaby solaı. Olar bul sheshimdi 2000 jyly qabyldaǵan. Endi osy zań boıynsha arnaıy esepte turǵan 1452 «buzyq» Brazılııaǵa bara almaıdy.
Bul shara álem chempıonatyn kórýge baratyn brıtanııalyqtardyń shyrqyn buzbaý úshin qajet.
Fýtboldan Brazılııada ótetin álem chempıonatynda qaýipsizdikti qamtamasyz etý úshin 1,9 mlrd. real (857,5 mln. AQSh dollary) bólinip otyr. Sondaı-aq, kúshtik qurylymdardyń 157 myń sarbazy dop dodasynyń tynyshtyǵyn kúzetedi.
Brazılııadaǵy álem chempıonatynyń qaýip-qatersiz ótýin qamtamasyz etý maqsatynda atalǵan elde quqyq qorǵaý qurylymdarynyń qatysýymen mamyr aıynyń ortasynan beri daıyndyq júrgizildi. Solardyń biri retinde Brazılııa úkimetiniń uzyndyǵy 16-19 myń kılometrge jetetin el shekarasyn túgel qamtyǵan iri operasııa ótkizgenin aıtýǵa bolady.
Brazılııa prezıdenti Dılma Rýsseff álem chempıonaty kezinde qaýipsizdik sharalary qatań saqtalatynyna kepildik berip otyr. Kúshtik qurylymdardyń sarbazdary chempıonat tolyq aıaqtalǵansha eshqaıda ketpeıdi.
Joldybaı BAZAR,
«Egemen Qazaqstan».