2022 jyldyń qorytyndysy boıynsha Qazaqstanda jeńil ónerkásiptegi óndiris kólemi 6%-ǵa artyp, 178 mlrd teńgege jetti, dep habarlaıdy Egemen.kz IIDM-ge silteme jasap.
Naqtyraq aıtsaq, toqyma buıymdarynyń óndirisi 5,3%-ǵa, kıim óndirisi 7,8%-ǵa, sondaı-aq bylǵary jáne onymen baılanysty ónimderdiń kólemi 3,7%-ǵa ósken.
Búginde jeńil ónerkásipti damytýǵa aıryqsha basymdyq berilip otyr. Sebebi bul salanyń halyqty jumyspen qamtýda áseri zor. Máselen, 2022 jyly jalpy quny 9,9 mlrd teńgege 6 ınvestısııalyq joba iske asyrylyp, óndiris oryndarynda 560-tan astam jumys orny ashyldy.
Mysaly, «Ońtústik» arnaıy ekonomıkalyq aımaǵynda ornalasqan kilem jáne kilem buıymdaryn shyǵaratyn «Bal tekstıl» kásiporny 4-shi sehyn iske qosyp, 40-qa jýyq adam jumyspen qamtyldy. Tartylǵan ınvestısııanyń kólemi – 2,5 mlrd teńge. Qazir atalǵan fabrıkanyń óndiristik qýaty jylyna 4 myń tonna polıpropılen jibi men 5 mln sharshy metrden astam kilem jáne kilem buıymdaryn shyǵarýǵa qaýqarly. О́ndiriste 1,5 myńnan artyq erekshe dızaın túrleri, onyń ishinde avangard, haı-tek, postmodern jáne ulttyq stıldegi órnekter qoldanylyp júr. Fabrıkanyń ónimderi TURAN, Han-Táńiri, Alataý, Bars, Saryarqa, Ulytaý, Alash, Otyrar markalarymen shyǵarylyp, álemdik deńgeıdegi sapaǵa sáıkes keledi. Oǵan ISO 9001-2009 sáıkestik sertıfıkaty dálel bola alady.
Sonymen qatar byltyr Aqtóbe tigin fabrıkasy da óndirisin keńeıtip, 130 jumys ornyn ashty. 2020 jyldan bastap jumys istep kele jatqan bul kompanııa sapaly ári qoljetimdi ónimderdiń óndirisin jolǵa qoıǵan. Qysqa ýaqytta kásiporyn senimdi taýar óndirýshi retinde bedelge ıe boldy. О́z kezeginde kásiporyn shyǵarylatyn ónimderdiń sapalyǵyna kepildik beredi. О́ıtkeni daıyn ónimder kópdeńgeıli tekserýden ótkizilip turady. О́nim modelderin ázirleýge dızaınerler, tehnologtar jáne tiginshilerden jasaqtalǵan bilikti qyzmetkerler qatysady.
Budan bólek Azala Cotton fabrıkasy aralas ıirilgen jip óndirisin iske qosyp, 200 jumys ornyn qurdy. Esterińizge sala keteıik, atalǵan kompanııa 2017 jyly qurylǵan. Qazir onda shyǵarylatyn daıyn ónim Shyǵys Eýropaǵa, Reseıge, Túrkııaǵa jáne Qytaıǵa eksporttalady.
Osy oraıda elimizde jeńil ónerkásipti damytýdyń 2022-2025 jyldarǵa arnalǵan Jol kartasy bekitilgenin aıta ketken oryndy. Bul qujat normatıvtik quqyqtyq bazany jetildirýdi, shıkizat bazasyn damytyp, óńdeý salasyn jolǵa qoıýdy, memlekettik qoldaý sharalary men kadrlyq qamtamasyz etýdi, jeńil ónerkásip taýarlaryn tańbalap, qadaǵalaýdy, sondaı-aq otandyq óndirýshilerdiń óndiristik qýatyn arttyrý men ınvestısııa tartýdy jáne álemdik tájirıbeni engizý men eksportty damytýdy kózdeıdi.