О́tken ǵasyrdyń 70-jyldarynda Qazaqstanda qoı sharýashylyǵyn órkendetýge jastardy tartý maqsatymen ártúrli aýqymdy is-shara júzege asyrylǵany belgili. Olardyń biri retinde sol kezdegi Semeı oblysy, Shubartaý aýdanynda alǵash qolǵa alynǵan komsomol-jastardyń shopandar brıgadalaryn aıtýǵa bolar edi.
Bul bastamaǵa birden ún qosyp, jalǵastyryp áketken Jambyl oblysyndaǵy Moıynqum aýdany ekeni de málim. Iá, qumdy ólkede jalyndy jastyqtyń otyn alaýlata jaǵyp, jarqyrap shyqqan, eki márte Sosıalıstik Eńbek Eri atanǵan Jazylbek Qýanyshbaev salǵan sara joldy ári qaraı abyroımen jalastyrǵan «Suńqar», «Shalqar», «Tulpar», «Qarlyǵash», «Shuǵyla» brıgadalarynyń aty alysqa ketip, olardyń eńbegi jaıynda baspasóz betterinde talaı jazylǵan.
Árıne, mektep bitire sala jas órenderdi mal sońyna salyp qoıý qazirgi kúnniń bıiginen qaraǵanda durys emes bolar. Biraq bul keshegi keńes ókimeti kezindegi ómir shyndyǵynyń kórinisi ǵoı. Degenmen sol jastardyń birqatarynyń, brıgadadaǵy eki-úsh jyl jumysynan keıin ınstıtýt, ýnıversıtetterge oqýǵa jeńildikpen túskeni de shyndyq.
«Aıdarly» keńsharyndaǵy «Suńqar» Moıynqumdaǵy osyndaı ujymnyń ozyǵynyń sanatynda bolǵandyqtan, oǵan joǵary jaqtan qonaqtar jıi-jıi at izin salatyn. Jetpisinshi jyldardyń ortasynda túsirilgen myna sýrette sondaı sáttiń biri beınelengen: Qazaqstan Kompartııasy Ortalyq komıtetiniń ekinshi hatshysy Valentın Karpovıch Mesıas (birinshi qatarda oń jaqtan tórtinshi, 1976 jyldan bastap KSRO Aýyl sharýashylyǵy mınıstri bolǵan, ol kisiniń oń jaǵynda Jambyl oblystyq partııa komıtetiniń birinshi hatshysy Hasen Bekturǵanov, sol jaǵynda Moıynqum aýdandyq partııa komıtetiniń birinshi hatshysy Aıtbaı Nazarbekov) Hantaýy bókterindegi «Suńqar» komsomol-jastar shopandar brıgadasy músheleri, sondaı-aq basqa da aýdandyq deńgeıdegi jetekshiler men atalǵan keńshar basshylarynyń arasynda.
Berikbaı QADYQOV,
jýrnalıst
Almaty oblysy,
Qarasaı aýdany