Ortalyq saılaý komıssııasy 2023 jyldyń 19 naýryzyna belgilengen Parlament Májilisi men máslıhattar depýtattarynyń kezekten tys saılaýyna baılanysty qoǵamdyq pikirge saýalnama júrgizý týraly aqparatty jarııalady, dep habarlaıdy Egemen.kz.
«Qazaqstan Respýblıkasyndaǵy saılaý týraly» Konstıtýsııalyq zańnyń 28-baby 9-tarmaǵynyń talaptaryna sáıkes saılaýǵa baılanysty qoǵamdyq pikirge saýalnama júrgizýdi Qazaqstan Respýblıkasynyń zańnamasynda tártippen tirkelgen, tıisti qujattardyń kóshirmelerin qosa bere otyryp, zańdy tulǵalar júzege asyra alady.
Ortalyq saılaý komıssııasyna jiberiletin habarlamada saýalnamaǵa qatysatyn jáne osy salada tájirıbesi bar mamandar týraly, qoǵamdyq pikirge saýalnama júrgiziletin óńirler týraly, qoldanylatyn taldaý ádisteri týraly málimetter kórsetiledi.
Saılaýǵa, buqaralyq aqparat quraldarynda, ınternet-platformalarda saılaýǵa baılanysty qoǵamdyq pikirge saýalnama nátıjelerin jarııalaý kezinde saýalnama júrgizgen zańdy tulǵany, saýalnama júrgizýge tapsyrys bergen jáne onyń aqysyn tólegen tulǵalardy, saýalnama júrgizý ýaqytyn, jınaý ádisin kórsetý mindetti.
Daýys berý kúnine bes kún qalǵanda (2023 jyldyń 14 naýryzynan 18 naýryzyna deıin) qoǵamdyq pikirge saýalnama nátıjelerin, saılaý nátıjeleriniń boljamdaryn, kandıdattardy nemese saıası partııalardy qoldaýǵa, ózge de zertteýlerdi ınternette jarııalaýǵa jol berilmeıdi.
Saılaýǵa baılanysty qoǵamdyq pikirge saýalnama júrgizý sharttaryn buzý adamdy ákimshilik jaýapkershilikke tartýǵa negiz bolady (ÁQBtK-niń 120-baby).
Buǵan deıin Májilis depýtattarynyń kezekten tys saılaýy 2023 jyldyń 19 naýryzynda ótetini habarlanǵan edi.
Buǵan deıin Memleket basshysy Qasym-Jomart Toqaev Parlament Májilisi men máslıhattar depýtattarynyń kezekten tys saılaýyn taǵaıyndaý týraly málimdeme jasaǵan.
Sondaı-aq Qazaqstan Respýblıkasynyń Prezıdenti jetinshi saılanǵan Qazaqstan Respýblıkasy Parlamenti Májilisin taratý jáne Qazaqstan Respýblıkasy Parlamenti Májilisi depýtattarynyń kezekten tys saılaýyn taǵaıyndaý týraly Jarlyqqa qol qoıǵan edi.
Keıin Memleket basshysy barlyq deńgeıdegi máslıhattardyń ókilettigin merziminen buryn toqtatý týraly Jarlyqqa qol qoıdy.