Kaırde (Mysyr) WKF karateden 1-Premier League-nyń 2023 jylǵa josparlanǵan alǵashqy básekesi óz máresine jetti.
Sportty damytý dıreksııasynyń málimeti boıynsha, Perǵaýyndar elinde uıymdastyrylǵan baıraqty dodaǵa ár salmaqtyń eń úzdik 30 sportshysy qatysty. Al jalpy álemniń 61 elinen kelgen 434 tatamı sheberi ónerlerin ortaǵa salǵan bolatyn. Bul qatarda Qazaqstan quramasynyń 19 karateshisi bas júldege talasty.
Eki kúnge sozylǵan dúbirli dodada ulttyq quramanyń sportshylary 4 júldege qol jetkizdi. Atap aıtqanda, kýmıte baǵdarlamasynda 60 kıloǵa deıingi salmaqta synǵa túsken Qaısar Alpysbaı fınalda jarys qojaıyny Muhamed Gaberdi 3:1 esebimen tize búktirip, altynnan alqa taqty. Al áıelder arasyndaǵy kýmıteniń +68 kılo salmaǵynda bas júldeni jerlesimiz, Tokıo Olımpıadasynyń qola júldegeri Sofıa Berýlseva men japonııalyq Aıýmı Ýekýsa sarapqa saldy. Tartysty ótken jekpe-jekte Aıýmıdiń aıy ońynan týyp, jarys jeńimpazy atandy – 7:1. Sofıa kúmis júldege qol jetkizdi. Sondaı-aq Dıdar Ámiráli (67 kılo) men Beıbarys Jańbyr (75 kılo) jarystyń qola júldesine ıe boldy.