Qazir ádebıetimizde ónimdi eńbek etip júrgen qalamgerdiń biri – halyqaralyq «Alash» ádebı syılyǵynyń laýreaty Qýandyq Túmenbaı. Proza men pýblısıstıkaǵa qatar qalam tartyp júrgen jazýshy keıingi jazǵan kórkem týyndylary týraly syr bólisti.
– О́tken jyly oıymda júrgen biraz dúnıeni aq paraqqa túsirdim. Eki hıkaıat jazdym. Onyń bireýin Mádenıet jáne sport mınıstrligi satyp alsa, bireýi ózimniń tartpamda jatyr. Búgingi zaman tynysyn beınelegen birqatar áńgime týdy. «Dıýananyń bıi» jazýshy, qaıratker Sherhan Murtazanyń 90 jyldyǵyna arnalǵan ádebı baıqaýda birinshi júldeni ıemdendi. Sondaı-aq «Eh, bostandyq» degen áńgimem «Qazaq ádebıeti» gazetiniń jeltoqsan aıyndaǵy sanynda jaryq kórdi.
Jas kúnimnen qalamym qańtarylyp kórgen emes. Kókeıde san problema qol bulǵap turady emes pe? Ádebıet pen táýelsizdikke qatysty oılarymdy, shamam kelgenshe jazyp júrmin. Mysaly, «Japon, japon degenshe» atty maqalamdy áleýmettik jeliniń qoldanýshylary jaqsy talqylady. Belgili memleket jáne qoǵam qaıratkeri Altynbek Sársenbaev týraly «Altynbekti nege aıtpaımyz?» degen tolǵanysym da kópshiliktiń kóńilinen shyǵyp, oǵan biraz oqyrman pikir jazdy.
Jańa jyl bastalysymen «Qalamger» ádebı-tanymdyq portalynda «Aýla sypyrýshy», «Ádebıet» portalynda «Kúnániń bergi beti» atty ystyǵy sýymaǵan eki áńgimem jaryq kórdi. Endi «Til» týraly bir hıkaıat jazsam degen oıym bar, ázir nobaıy kókiregimde kúmbirlep tur.