ASTANA. 20 maýsym. Memleket basshysy Nursultan Nazarbaev Koreıa respýblıkasy prezıdentiniń sapary ekijaqty baılanystardy odan ary damyta beredi dep málimdedi. Bul týraly akorda.kz habarlady.
Nursultan Nazarbaev: «Ońtústikkoreıalyq seriktestermen shıkizattyq emes saladaǵy yntymaqtastyq júıeli túrde keńeıip keledi. Qazirdiń ózinde 300-den asa birlesken kásiporyn quryldy, sonyń ishinde jeńil avtomobılder men júk jáne jolaýshy tasymaly kólikterin qurastyrý kásiporyndary bar. Balqash jylý elektr stansasy, Atyraý oblysyndaǵy gaz-hımııa kesheni qurylysy, «Jambyl» kenishin ıgerý sekildi iri jobalar tabysty ilgerileýde. Sondaı-aq, kelissózder barysynda biz Pak hanymmen birge koreılik bıznestiń Qazaqstannyń údemeli ındýstrııalyq-ınnovasııalyq damý baǵdarlamasyna qatysýy jaıyn talqyladyq. Taraptar «tehnologııalardy resýrsqa almastyrý» formýlasy boıynsha yntymaqtasýǵa múddeli ekendigin qýattady», – dedi.
Budan bólek, Prezıdent eki el arasynda vızasyz rejim ornatylatynyn, bul qos memleket úshin yńǵaıly jáne tıimdi bıznestik ahýal qalypastyratynyn jetkizdi.
Koreıa respýblıkasy prezıdenti Pak Kyn He óz kezeginde: «Biz ınfraqurylymdyq qurylys, ǵylym men tehnologııa, orman sharýashylyǵy men ekologııa sııaqty salalardaǵy yntymaqtastyq aıasyn keńeıte otyryp, eki eldiń birlese damýyna jáne Qazaqstan ekonomıkasyn ártaraptandyrýǵa úles qosý jóninde kelisimge keldik. Eki eldiń bolashaqqa mejelengen qarym-qatynasy úshin gýmanıtarlyq-mádenı almasýdy jandandyryp, bastapqy kezeńde ınvestısııalyq kedergilerdi azaıtý mańyzdy ekeni jóninde ortaq toqtamǵa keldik», – dedi.
Taraptardyń kezdesýi barysynda belgili bolǵandaı, Ońtústik Koreıa jaǵy elimizdiń Dúnıejúzilik saýda uıymyna kirýge degen talpynysyn qoldap otyr.
Pak Kyn Heniń aıtýynsha, eger elimiz Dúnıejúzilik saýda uıymyna kiretin bolsa, eki el arasyndaǵy saýda-ınvestısııalyq yntymaqtastyq arta túsedi.
Ońtústik Koreıa prezıdenti kezdesý sońynda: «Osy sapar ótken jıyrma jyl ishinde qalyptasqan senimdi qarym-qatynastar áleýetiniń budan ári damytylýyna aıtarlyqtaı serpin beredi», – dedi.
Joldybaı Bazar.
Derekkóz: akorda.kz.
Foto: sk.kz.