EL jáne ELBASY
«Bereke-birligimizdiń uıytqysy»
Tórehan Muqanova, «Altyn alqa» ıegeri: Bizdiń qatarlastarymyzdyń barlyǵy eńbekpen etene ósti. Jubaıym Jumabaı ekeýmiz de el qatarly eńbek ettik. Keńshardyń bir otar qoıyn baǵyp, hal-qaderimizshe ómir súrdik. Eńbek ete júrip, on bala ósirip, tárbıeledik. Balalardyń barlyǵy da eńbektiń dámin tatyp ósti. Qazir árqaısysy bir-bir shańyraq ıesi. Bir jaqsysy, ushqan uıalarynda jıi bas qosyp, bizdiń jaǵdaıymyzdy oılap turady. Ana úshin eń qajettisi de osy emes pe? Nemere, shóbere súıip otyrmyn. Egemendi elimizdiń gúldenip, kórkeıip kele jatqanyn kórip, keýdemdi qýanysh kerneıdi. Balalardyń bári de jumys isteıdi, turmystary jaqsy. Sonyń barlyǵy elimizdegi bereke-birliktiń arqasy ekenin ana retinde sezinemin. Ananyń tilegi qashanda beıbit ómir, urpaǵynyń amandyǵy ǵoı. Shúkir, bizdiń Elbasy Nursultan Nazarbaev buǵan tolyq jaǵdaı jasap otyr. Jyl saıyn turmysymyz túzelip, jaǵdaıymyz jaqsaryp keledi. Zeınetker bolǵan soń, óz turǵylastarymnyń da pikirine qulaq túre júremin. Barlyǵynyń aıtary Elbasyna degen rızashylyǵy der edim. Nemerelerimiz jańa mektepterge baryp, tereń bilim alyp jatsa, jyl saıyn zeınetaqymyz ósip, ózimizge sapaly medısınalyq qyzmet kórsetilip jatsa, bizge budan artyq ne kerek. Qazir Elbasynyń utyrly saıasatynyń arqasynda jańa kásiporyndar salynyp, ashylyp jatyr. Bul – balalar úshin jańa jumys orny degen sóz. Iаǵnı eńbek etemin degen adamǵa jumys tabylady. Jumysy bolsa, jastar da uly kóshke ilesedi dep oılaımyn. Biz eńbektiń beınetin kórińkiredik, árıne. Biraq, egemendi elimizdiń damý ekpinin kórip, kádimgideı marqaıamyz. Arqaǵa Astanany kóshirgende kóńilimiz kúptileý bolǵanyn jasyrýdyń da reti joq. Al Astanany óz kózimmen kórgennen keıin Elbasynyń ǵajaıyp bastamalarynyń baıandylyǵyna ımandaı uıydym desem, artyq aıtqandyq bolmas. Sáýleti kelisken elordanyń kelbeti kisi qyzyqqandaı eken. Bul – meniń júrekjardy pikirim. Biz barymyzdy baǵalaı bilýimiz kerek. Baıtaq elimizdiń erteńin oılap, is qylyp júrgen Elbasymyzdyń ár qadamy týǵan jerimizdi kórkeıtý, egemendi elimizdi damyǵan elder qataryna jetkizý ekenin barsha halyq túsinedi. Biz eldegi ıgilikti ańǵaryp otyrmyz. Sarabdal saıasaty men ulttyq ustanymyn álem moıyndaǵan Prezıdentimiz Nursultan Nazarbaevtyń el úshin jasaǵan eńbegi ushan-teńiz. Ony qarapaıym halyq kórip te, bilip te otyr. Kúni keshe aýyldan údere kóshken halyq qazir shamasy kelse, aýylǵa barýǵa, mal ósirýge yntaly. Iаǵnı eldegi berekeniń baǵy jana bastaǵany. Elbasynyń halyqqa jasaǵan jaqsylyqtary jeterlik. Sondyqtan da, Prezıdentke degen súıispenshilik joǵary, yqylas ystyq. Men de sol kóptiń biri retinde Nursultan Ábishulyna ıgi tilegimdi arnap otyramyn. Erteńimizdiń kepili, búginimizdiń berekesin keltirgen Elbasy alda da táýelsiz memleketimizdi tyń tabystarǵa bastaıtynyna senimim mol. Osyndaı baqýatty turmys pen beıbit ómirge jaǵdaı týǵyzyp otyrǵan Elbasyna analyq alǵysym sheksiz. Aqtóbe.«Jas ómirimdegi jarqyn sátterdiń biri»
Mámbet BIGELDIEV, «О́zenmunaıgaz» AQ-tyń munaıshysy: Qazaqstan, Táýelsizdik, Astana! Osy úsh uǵymnyń halqymyzdyń sanasyna úlken jańalyqtyń, uran men rýhtyń, erkindik pen erliktiń belgisindeı nyq ornaǵandyǵy qýantady. Keshegi tolarsaqtan saz, tobyqtan sý keshken, eńsesin el dep kóterip, kózin keleshek dep ashqan qaıran babalardyń armany da osy emes pe?! Qazaqtyń kósilgen Saryarqasynyń tórinde Astananyń boı kóterýi de bıik birlik pen asqaq armannyń nyshany dep aıtýǵa bolady. Kóptegen eldiń shańyraǵy shaıqalyp, berekesi ketken kezderi Turan dalasynda tynyshtyq ornaýy kim-kimdi de qyzyqtyratyny haq. Qazaq dalasynyń ońtústigi men soltústiginiń, shyǵysy men batysynyń ystyq yqylasy, adal nıetiniń bir arnaǵa – eldik murat pen elordasy – Astanaǵa túıisýi barshamyzdyń janymyzǵa shýaq, qanymyzǵa qýat beredi. Osynaý bolashaqqa bet burǵan, keleshektiń shyńyna umtylǵan uly kóshtiń qarqyn alyp qaryshtaýynda munaıyn burqaqtatyp, mereıin asyrǵan Mańǵystaý ólkesindegi munaıshylardyń úlesi zor dep aıta alamyn. Ǵylym men ónerdi óristetip, árkez Elbasy joldaýlaryna ún qosyp, aýyzbirlik pen adamgershiliktiń alańynan tabylatyn da osy munaıshy azamattar. Osy jyly kóptegen munaı mekemelerinde jastar uıymy qurylyp, ózara pikir almasyp, qaıyrymdylyq pen qajyr-qaırattyń týyn jelbiretti. Munaıshy jastardyń qaı kezde de bas biriktirip, eńseli túrde tize qosýy el erteńine degen senimdi nyǵaıta túsedi. Meniń Astanaǵa alǵash 2001 jyly jolym tústi. Ol kezde men stýdent bolatynmyn. Qazaqstan Respýblıkasynyń Táýelsizdigine 10 jyl tolý merekesine oraı uıymdastyrylǵan shyǵarmalar baıqaýynda júldeger atanyp, osy jetistik nátıjesinde Astanaǵa barý qurmetine ıe boldym. Osy joly, ıaǵnı «Táýelsizdik merekesi» dep atalatyn qasıetti mereke qarsańynda Elbasymyz N.Á.Nazarbaevpen kezdesý mártebesine ıe boldym. Kezdesý barysynda Prezıdentimizdiń qolyn alyp, amandasqan sátte ózimdi azamat retinde úlken jaýapkershilik kútip turǵandyǵyn sezindim. Bar ynta-yqylasymen qatar, úlken kemeńgerlik beınesin tanyta sóılegen Elbasy bizderge úlken úmit artatyndyǵyn aıta otyryp, óziniń bolashaqtaǵy josparlarymen bólisti. Jas ómirimdegi áserli sátterge jatatyn osy oqıǵa meniń óz jolymdy tabýǵa kóp yqpal etti deýge bolady. Áli de talaı atqarylar ister, jasalar sharalar jeterlik. Bastysy – jolymyz ashyq, baǵytymyz aıqyn, bolashaǵymyz jarqyn. Erteńgi urpaq maqtanatyndaı, darııadaı darhan, qarııadaı kemel el qalyptastyrý búgingi bizdiń qolymyzda ekendigin uǵynsaq, azamattyq jaýapkershilik, perzenttik paryz salmaǵy men mańyzy sezile túsedi. Mańǵystaý oblysy, Jańaózen qalasy.«Qazaqstan – barshamyzdyń qorǵanymyz»
Ilahýn JALILOV, Almaty qalalyq uıǵyr etnomádenı birlestiginiń múshesi, aqyn: Astanasyna qarap elin tanýǵa bolatyny shyndyq. Bizdiń Otanymyzdyń elordasy – Astana qalasy egemen elimizdiń kelbetin beıneleıtin alyp shaharǵa aınalyp otyr. Elimizdiń bas qalasy ulttyq mádenıettiń ortalyǵyna aınalǵannan beri el turǵyndarynyń ǵana emes, alys-jaqyn shetel azamattarynyń da nazaryn ózine qaratyp keledi. Álbette, bizdiń súıikti Astanamyzdy bir kórgen sheteldik qonaq onyń sulýlyǵy men kórkemdigine tamsanyp, tańdanatyny sózsiz. Sebebi, Qazaqstan egemendik alǵanyna jıyrma jyldan jańa assa, elordanyń el astanasyna aınalǵanyna 16 jyl ǵana tolyp otyr. Búgingi tańda bizdiń ekonomıkadaǵy, saıasat pen mádenıet, bilim-ǵylymdaǵy jetistikterimizge, sonyń ishinde, Astana qalasynyń ǵajaıyp ósip-órkendep, dúnıe júzindegi eń aldyńǵy qatarly qalalar sapyna kirýge batyl qadam jasap kele jatqanyna búkil álem tańdana nazar salýda. Bul jetistikter, eń aldymen, keleshekti boljaı biletin, aqyldy da parasatty Prezıdentimiz Nursultan Nazarbaevtyń bastamasy jáne tikeleı basshylyǵymen júzege asqan ǵalamat jańalyq ekenin aıtý kerek. Astana – egemen Qazaqstannyń ortalyǵy, memlekettik sıpatymyzdyń belgisi. Ǵasyrlar boıy halqymyz armandaǵan táýelsizdik, erkindik, bostandyqtyń sımvoly. Qazaqstandyqtardyń shyn maǵynasyndaǵy júregi jáne maqtanyshy ekeni sózsiz! Astana shartarapqa jaıylyp, bıikke órlep ósýde. Az jyldar ishinde ǵajaıyp ǵımarattar boı kóterdi. Aspanmen boı talasqan bıik ǵımarattar – «Báıterek», Beıbitshilik jáne kelisim saraıy, basqa da arhıtektýralyq ansamblder, ákimshilik keshender, «Astana Opera» opera jáne balet teatry, turǵyn úıler, mádenıet, sport nysandary qala kórkine kórik qosyp tur. Bul nysandar bir-birine uqsamaıdy. Árqaısysy arhıtektorlyq erekshelikke ıe. Mundaı erekshelikter dúnıejúziniń basqa qalalarynda sırek kezdesse kerek. Astana keleshekte dúnıejúzilik týrızmniń ortalyǵyna aınalýy úshin barlyq múmkinshilikterdi paıdalanýdy kózdep otyr. Sondaı-aq, dúnıejúzilik mádenıet ortalyǵyna aınalmaqshy. Astana elimizdegi 140-qa jýyq ult ókilderiniń basyn biriktirip, olardy bir otbasynyń músheleri sııaqty tatý ómir súrýge kepildik berýmen qatar, dúnıe júzi halqynyń beıbitshilik, ózara túsinistik ornatý jolynda da úlken jumystardy júzege asyratyn ortalyqqa aınaldy. Biz ǵajaıyp bir dáýirdiń, óte úlken ózgeristerdiń kýágerleri bolyp otyrmyz. Bizdiń kóz aldymyzda adamdarymyzdyń kúsh-jigerimen jańa memleket boı kóterip, kámeletke tolýda. Bul – bizdiń kópultty halqymyzdyń birliginiń, tatýlyǵynyń, bir maqsatty kózdep áreket etýiniń, elimiz Prezıdenti Nursultan Nazarbaevtyń dana basshylyǵynyń nátıjesi. Biz ózimizdiń Prezıdentimizben, onyń tikeleı basshylyǵymen dúnıege kelgen Astana qalasymen maqtanamyz. ALMATY.«Prezıdenttiń qolyn qysyp úlgerip edim»
Nurzııa ATAEVA, Moıynqum aýdany ákimdigi keńse bóliminiń basshysy: 2012 jyldyń qarasha aıynda ótken «Jas Otan» jastar qanatynyń II sezinde jastardyń Elbasy Nursultan Nazarbaevqa degen qoshemetin, rııasyz kóńilin sózben jetkizý qıyn. Prezıdenttiń, ásirese, qarapaıymdyǵy erekshe rýhtandyrady. Sezde barlyq salany qamtyp, alda atqarylar sharýalardy saralap bergen Elbasy sóz sońynda jastarmen estelik sýretke tústi. Janyna jarysa barǵan jastardy jaýapty tulǵalar toqtata almady. Múmkindikti qalt jibermegen jastardyń qatarynan boı kórsetýim bir maqsatymnyń oryndalǵany edi. Taý tulǵanyń mysy basyp, qatty qobaljydyq. Kóńilimizge qarap, sál kidirip qalǵan Prezıdenttiń qolyn qysyp, «Aman bolyńyz!», dep aıtyp úlgerdim. Mine, jastardyń Nursultan Ábishulyna degen, kerisinshe, Elbasynyń jastarǵa degen qoshemeti, qurmeti sharyqtaǵan sol sát sanamyzda saırap tur! Eldiń egemendigin, Táýelsizdiktiń tuǵyrlylyǵyn, ekonomıkanyń qýattylyǵyn, halyqtyń ál-aýqatyn nyǵaıtyp, jastaryn alǵyrlyqqa baýlyǵan Elbasyna qashanda tilektes bolý meniń azamattyq paryzym dep bilemin. Sebebi, dál qazirgi ýaqytta jastar saıasatyna degen qoldaýdyń aıaqqa nyq turyp, berekesi artyp tur. Elbasy el ekonomıkasynyń damýyna birden-bir úles qosatyn mańyzdy salalardyń tizginin jas mamandarǵa ustatýy kún sanap artyp keledi. Árıne, bul degenińiz, jastarǵa degen úlken senimdiliktiń bastaýy. Qabileti barǵa, qolynan is keletinge túrli baǵdarlamalardy alǵa tartty. Máselen, jas tolqynnyń bilimi men biligin ushtastyratyn «Bolashaq» baǵdarlamasy talaı jastyń armanyna qanat bitirdi. Keıingi jyldary joǵary jáne arnaýly orta bilimdi támamdaǵan jas mamandar úshin zor suranysqa ıe bolǵan «Jastar is-tájirıbesi» jobasynyń da sharapaty mol. Jumys tappaı, sergeldeńge túsken oqý bitirýshiler osy joba arqyly 6 aı merzimde túrli mekemelerde tájirıbeden ótip, jumysqa ornalasýǵa múmkindik alyp otyr. Mine, qamqorlyq pen janashyrlyqty túsingen adamǵa Elbasynyń eńbegi ushan-teńiz. Jambyl oblysy.