Kerrıdiń Mysyrǵa kútilmegen sapary

Sharaına AQSh-tyń memlekettik hatshysy Djon Kerrı ótken jeksenbi kúni kútpegen jerden Kaırǵa saparmen kelip, Egıpettiń jańadan saılanǵan prezıdenti Ábdel Fattah as-Sısımen kelissóz júrgizdi. Áńgime arqaýy eki jaqtyń da múddesine sáıkes keletin taqyryptar bolǵan. Bul AQSh-tyń joǵary shendi ókiliniń as-Sısı prezıdent bolyp saılanǵannan keıingi Mysyrǵa alǵashqy sapary bolyp tabylady. 1979 jyly Izraılmen beıbit kelisimge qol qoıǵannan soń Egıpet AQSh-tyń Orta Shyǵystaǵy asa kúshti odaqtastarynyń biri bolǵan edi. Alaıda, Islam serkesi Muhammed Mýrsı jappaı narazylyq aksııalarynan keıin prezıdenttikten ketirilgen soń eki el arasyna belgili bir deńgeıde syzat túskendeı-tin. Mavrıtanııa prezıdenti qaıta saılandy Mavrıtanııanyń is basyndaǵy basshysy Mohammed Ýld Ábdel Ázız el prezıdentin saılaýda 88 paıyz daýys jınap, prezıdenttikke qaıta saılandy. Onyń eń jaqyn básekelesi bar bolǵany 8-aq paıyz daýys alǵan. Negizgi oppozısııalyq partııalar saılaýǵa qatysýdan bas tartqanymen, saılaýshylardyń 56 paıyzy daýys bergen. Ábdel Ázız bılikke 2008 jyly memlekettik tóńkeris nátıjesinde kelgen bolatyn. Ol qashanda Batystyń Afrıka aýmaǵyndaǵy terrorlyq uıymdarmen kúreste senimdi áriptesi bolyp keledi. Saılaý nátıjesin oppozısııa moıyndamaǵanmen, Batys osy sebepti de Mavrıtanııa basshylyǵynyń isine aralasqandy qalamaıdy. Degenmen, qazirgi kezde qarýly jasaqtar kúsheıip otyrǵandyqtan, alda Ábdel Ázızdi úlken synaqtar kútip turǵandaı. Áskerı nysandaryna soqqy berdi Izraıl áskerı-áýe kúshteriniń ushaqtary keshe Sırııanyń birqatar aýmaǵyna soqqy berdi. Bul soqqy sırııalyq tankke qarsy snarıadtyń ızraıldik jasóspirim otyrǵan avtomobıldi jaryp jiberýine jaýap bolyp tabylady. Túngi avıashabýyl barysynda Izraıl ushaqtary arasynda Sırııanyń komandalyq shtaby da bar 9 áskerı nysandy qıratqan. Tel-Avıv Golan bıikterinde avtomobıldi jaryp jiberý oqıǵasy josparly túrde jasalǵan arandatý dep sanaıdy. Sol oqıǵa oryn alǵan 22 maýsymda Izraıl tankteri Sırııa shepterine qarsy oq atqan bolatyn. Jalpy, Golan bıikterin Izraıl 1967 jyly Sırııaǵa qarsy soǵystyń nátıjesinde jaýlap alǵan edi. Al Damask atalǵan bıiktikti áli de óziniń zańdy aýmaǵy dep esepteıdi.

Qysqa qaıyryp aıtqanda:

—* Ońtústik Koreıada áskerı qyzmetshi óziniń bes qyzmettesin atyp óltirip, taǵy jeteýin jaralaǵan. Oqıǵa Ońtústik Koreıany Soltústik Koreıamen bólip turatyn demarkasııalyq syzyqqa jaqyn jerde bolǵan. Oq atqan áskerı izdestirilýde kórinedi. *— Rım Papasy mafııanyń barlyq múshelerin shirkeýden alastalǵandar dep atady. Ol óziniń málimdemesin Italııanyń ońtústigindegi Kalabrııa óńirine sapary kezinde jasady. Bul óńirde mafııanyń shepteri myqty sanalady. —*Nıý-Iorkte kóldeneń taksıst reseılik bıznesmen Vladımır Zaharovty 23 metr jerge jetkizip tastaǵany úshin 149 dollar talap etken. Kelispegen 75 jastaǵy reseılik soqqyǵa jyǵylǵan. — Mysyrdyń soty 180 ıslamıske ólim jazasy shyǵarylǵanyn qýattady. Olardyń arasynda «Musylman baýyrlardyń» serkesi Mohammed Badı de bar kórinedi. Jalpy, úkim shyǵarylǵandardyń ony qaıta qaratýǵa quqyqtary bar. Snoýden erligi úshin marapattaldy Amerıka arnaıy qyzmetiniń burynǵy qyzmetkeri Edvard Snoýden 21 maýsym kúni «Gýmanıstik odaq» qoǵamdyq uıymynan syılyq aldy. Qashqynda júrgen barlaýshy bul nyshandyq syılyqqa azamattyq erligi úshin laıyq dep tabyldy. Uıym basshysy Verner Kep-Kerstın marapattaý rásimin Rashtat qalasynda ótkizgen. Al syılyq Frıs Baýer atyndaǵy dep atalady. «Edvard Snoýden AQSh-tyń arnaıy qyzmetteri tarapynan zańsyz adam sońyna túsý praktıkasyn jalǵannyń jaryǵyna shyǵarýda naǵyz moraldyq erlik kórsetti», depti marapattaý rásiminde sóz sóılegen Kep-Kerstın. Al Frıs Baýer «Osvensın prosesterinde úlken ról atqarǵan nemis sýdıasy ári prokýrory bolyp tabylady. Qurbandyq – taǵy eki palestınalyq Izraıl áskerıleri Iordan ózeniniń Batys jaǵalaýynda eki palestınalyqty atyp óltirdi. Áskerıler qarýdy palestınalyqtardy jappaı tutqynǵa alý kezinde týyndaǵan qaqtyǵys kezinde qoldanypty. Adam ólimine soqtyrǵan bul qaqtyǵys 6 palestınalyqty tutqyndaý kezinde oryn alǵan. Izraıl qazirgi kezge deıin Batys jaǵalaýynda 13 maýsym kúni joǵalyp ketken úsh jasóspirimdi izdestirip jatyr. Izdeý operasııalary bastalǵaly beri áskerıler kem degende tórt palestınalyqty óltirip otyr eken. 340 palestınalyq tutqynǵa alynypty. Dinı mekteptiń úsh oqýshysy Gýsh-Esıon eldi mekeni aýdanynda iz-túzsiz ketse kerek. Izraıl bıligi jasóspirimderdi HAMAS toby urlap ketti dep aıyp taǵýda. Malaızııa jaǵalaýyndaǵy keme apaty Malaızııa jaǵalaýy mańynda ındonezııalyq mıgranttardy alyp kele jatqan keme sýǵa batyp ketti. Oqıǵa Sepang qalasynan 20 shaqyrym jerde oryn alǵan. Keme bortynda 27 adam bolypty. Olardyń toǵyzy iz-túzsiz joǵalǵandar qatarynda bolsa, olardy qazir malaı teńizshileri izdestirip jatyr eken. 18 adam, onyń ishinde 4 áıel bar, múldem kezdeısoq jaǵdaıda qutqaryp alynǵan. Keme sýǵa batar tusta janynan saýda kemesi ótip bara jatyr eken. Sondaǵylar kómek týraly aıqaı-shýdy estip, járdem qolyn sozypty. Bul Malaızııa jaǵalaýyndaǵy ekinshi apat bolyp otyr. 18 maýsym kúni sol mańaıda 97 adamdy alyp kele jatqan keme sýǵa batyp ketse, 23 adamdy tabý múmkin bolmaǵan-tyn. Malaızııa – serpindi damyp kele jatqan elderdiń biri, sondyqtan jumys kúshi de kóp talap etiledi.  

Internet materıaldary negizinde ázirlendi.