«Respublica» partııasynyń Kókshetaýdaǵy jıyndaryna myńǵa jýyq adam qatysty. Kókshetaý qalasynda aýyl sharýashylyǵy taýar óndirýshileri, eńbek ujymdary jáne isker áıelder qaýymdastyǵy ókilderimen kezdesýler ótti.
«Qazir ýnıversıtetter men bıznestiń ártúrli keńistikte ekenin kórip otyrmyz. Bıznes ókilderi joǵary oqý oryndarynyń qamqorshylyq keńesterinde bolyp, bolashaq mamandardy daıarlaý baǵdarlamalaryn retteýi qajet. Bul shara orta merzimdi perspektıvada bilim sapasy men eldiń kadrlyq áleýetin arttyrýǵa múmkindik beredi», dedi partııa tóraǵasy, Parlament Májilisiniń depýtattyǵyna kandıdat Aıdarbek Qojanazarov.
Ol «Tynys» AQ ujymymen kezdesý barysynda joǵary bilikti mamandardy daıarlaý úshin bıznes pen joǵary oqý oryndarynyń belsendi yntymaqtastyǵy qajettigin atap ótti.
Al partııanyń teń tóraǵasy, Parlament Májilisiniń depýtattyǵyna kandıdat Dınara Shúkijanova oblystyq isker áıelder qaýymdastyǵynyń ókilderimen kezdesýinde qoǵamda áli kúnge deıin áıeldermen baılanysy bar stereotıpter taqyrybyn kóterdi.
«Qostanaı qalasynda «AgromashHoldıng KZ» jáne «SaryarqaAvtoprom» sııaqty kombaın men mashına shyǵaratyn zaýyttar bar ekenin bárińiz bilesizder. Men osy qurylymdarǵa 2011 jyly qatardaǵy qyzmetker bolyp keldim, 12 jyldan keıin osy kásiporyndardy basqarýǵa kiristim. Bir kúni klıentterdiń biri menimen kezdesýge keldi. Dálizde júr eken, qarsy alaıyn dep aldynan shyqtym, ol kúrteshesin sheship, meniń qolyma ustatty. Sodan soń: «Rahmet, sizdiń prezıdentińiz qaıda?» dedi. Men prezıdent ekenimdi aıttym, biraq ol: «Joq, joq! Kompanııanyń prezıdenti Dınara qaıda?» dedi. Men kompanııanyń basshysy ekenimdi aıttym taǵy da. Ol tańǵaldy, keń shalbar kıgen, qolynda balǵasy bar, boıy eki metr áıeldi elestetkenin de jasyrmady. Men mundaı stereotıpterdi jıi kezdestiremin», dedi Dınara Shúkijanova.
Jalpy, «Respublica» partııasynyń teń tóraǵasy qoǵamdaǵy kóshbasshy áıelderge degen kózqarasty ózgertý qajet dep sanaıdy. «Parlamenttegi áıelder úlesin arttyrýdy talap etýiniń bir sebebi de osynda», deıdi ol.