ASTANA. 25 maýsym. Qaraǵandyǵa «Sınhýa» qytaı energetıkalyq korporasııasynyń basshylary kelip, oblys ákimi Nurmuhambet Ábdibekovpen kezdesti. Bul týraly «QazAqparat» habarlady.
Atalǵan kezdesýde «Kýzneskıı» razrezinde kómirdi keshendi óńdeý boıynsha jobany júzege asyrýǵa qatysty máseleler talqylandy.
Nurmuhambet Ábdibekov: «Búgin biz jobanyń qazirgi jaǵdaıyn talqylap, aldaǵy ýaqytta birlesken jumystyń naqty josparyn anyqtaý úshin jınaldyq», – dedi.
Al «Sınhýa» korporasııasy bas dırektorynyń orynbasary Lang Ing óz kezeginde: «Investısııalardyń jalpy somasy 2 mlrd. dolardy quraıdy. Zaýyt qurylysy eki kezekke bólingen», – dedi. Sondaı-aq, atalǵan korporasııanyń basqarma tóraǵasy Hýo Ksınghýa: «Biz bul aımaqta jańa kómir hımııasy óndirisin damytamyz. Kómir arqyly Qazaqstanda taza qýat kózin engizýge jol ashamyz», – dedi.
Qytaılyq ınvestorlardyń sózine qaraǵanda, «Kýzneskıı» kómir razrezine arnaıy taldaýy júrgizilgen. Degenmen, áli de bolsa tereńdetilgen marketıngti zertteýler júrgizý qajet. Al qarjylandyrý shemasy ázirge anyqtala qoımaǵan.
Mamandardyń esepteýinshe, jobanyń júzege asyrylýy óndirilgen kómirdiń ár tonnasynan ekonomıkalyq tıimdilikti 5-7 ese ulǵaıtýǵa múmkindik beredi.
Kezdesýde jergilikti halyqtyń joba boıynsha jumysqa tartylýy jáne otandyq materıaldardy paıdalaný máseleleri basty nazarda boldy. Sonymen qatar, óńir basshylary ekologııalyq talaptar men standarttardy saqtaý isin naqtylady.
Ekijaqty kezdesýde Qaraǵandy oblysy men qytaılyq «Sınhýa» energetıkalyq korporasııasy kómirdi keshendi óńdeý jóninde memorandýmǵa qol qoıdy.
Esterińizge sala keteıik, bul kelisim Memleket basshysy Nursultan Nazarbaev pen Qytaı halyq respýblıkasynyń tóraǵasy Sı Szınpın arasyndaǵy kelissóz barysynda qol jetkizilgen ýaǵdalastyqtar aıasynda júzege asyrylǵaly otyrǵan jobalardyń biri. Jylpy, Qytaı ınvestorlary kómirden sıntetıkalyq suıyq otyn óndirýdi josparlap otyr. Kásiporyn benzın, dızeldik otyn men joǵary baǵaly túrli hımııalyq ónimderdi shyǵarady dep kútilýde.
«Sınhýa» korporasııasy kómirdi óndirý, baıytý, kokstaý jáne hımııalaý boıynsha iri jekemenshik kompanııa bolyp tabyldy.
Joldybaı Bazar.
Derkkóz: «QazAqparat».
Foto: «QazAqparat».