Malaızııa mal fermasyn kóbeıtpek

Jaqynda Jambyl oblysynyń ákimdigi Malaızııanyń «AGROSTAN FARMS SDN BHD» kom­panııasymen memorandýmǵa qol qoıdy. Naqtyraq aıtsaq, mamyr aıynda Malaızııa premer-mınıstri Nadjıb Týn Razaktyń elimizge kelgen resmı sapary barysynda bıznestik qurylymdar arasynda jalpy mólsheri 1,1 mlrd. dollardan asatyn úsh kelisimshartqa qol qoıylǵan bolatyn. Bul jo­balardyń ekeýi Mańǵystaý, bireýi Jambyl oblysynda júzege asatyn bolyp kelisildi. Sheteldik kompanııa Jambyl jerinde iri qara mal sanyn kóbeıtip, 500 ferma ashýdy maqsat tutyp otyr. Bul kelisimshart sondaı-aq, óńirdegi et jáne sút sharýashylyǵyn damytýǵa úlken serpin beretini anyq. Investorlar sút pen et ónim­derin óńdeý úshin qajetti ınfraqurylymdardy tartyp, osy salany damytýǵa jaǵdaı jasaıtyn bolady. Sondaı-aq, selek­sııalyq jolmen iri qara malynyń genetıkalyq áleýetin jetildirý isi de qolǵa alynbaq. Oblystyq aýyl sharýashylyǵy basqarmasy basshysynyń orynbasary Kemelhan Ábilekovtiń aıtýyna qaraǵanda, bul úshin malazııalyq kompanııa 50 myń iri qara malyn ákelýdi josparlaýda. Kompanııa alǵashqy kezeńde el ekonomıkasyna 350 mln. AQSh dollaryn salady. Sóıtip, bıylǵy jyly jemshóp bazasyn daıyndaý jumystary júredi. Al, kelesi jyldan bastap 10 myńnan 30 myń basqa deıin mal ákelinip, 20 myńy Shý aýdanyna, qalǵan 30 myń bas «Batys Eýropa-Batys Qytaı» halyqaralyq jolynyń boıy­nan ashylatyn shaǵyn fermalarǵa berilmek. Malaızııa – shetelge et eksporttaıtyn eń áleýetti memlekettiń biri. Bul elde azyq-túliktiń qaýipsizdigin qamtamasyz etý maqsatynda barlyq sharalar qarastyrylǵan. «AGROSTAN FARMS SDN BHD» kompanııasy da osynyń arqasynda jumysyn óristetip otyr. Bul kom­panııanyń Jambyl jerinde qolǵa alǵaly otyrǵan jobasy iske asqan jaǵdaıda jergilikti jerde óńdelgen et pen sút ónimderi shetelge eksporttalyp, tipti, oblys turǵyndarynyń suranysyn qanaǵattandyratyn bolady. Jáne osy tirliktiń arqasynda qanshama jannyń jumyspen qam­tylatyny aıtpasa da túsinikti. «Qaıratty erde mal turar, ónerli erde baq turar» degen, Jambyldyń sharýaǵa beıim, qaıratty jigitteriniń shıraq qımyldap, úlken bir tirlikti bastaýǵa osy joba zor múmkindik beretini sózsiz. Oralhan DÁÝIT, «Egemen Qazaqstan». Jambyl oblysy.