«Amanat» partııasynyń atynan Parlament Májilisiniń depýtattyǵyna kandıdat Maqsat Tolyqbaı bastaǵan úgit-nasıhat toby Shymkent qalasynda saılaýshylarmen birqatar kezdesý ótkizdi. Olar tennıs ortalyǵynda qalanyń belgili sportshylarymen, bapkerlerimen júzdesip, partııanyń sport jáne dene shynyqtyrýdy damytý baǵytynda atqaratyn jumysyn talqylady.
Partııa aldaǵy 5 jylda Shymkent qalasynda buqaralyq sportpen aınalysatyn turǵyndardyń úlesin 50 paıyzǵa deıin jetkizýdi kózdep otyr. 2023-2027 jyldary Shymkentte 100 ashyq sport alańyn salýǵa yqpal etedi. Buǵan qosa, Shymkentte jańa ıppodrom ashylyp, Metallýrgter sport kesheni qaıta jańǵyrtýdan keıin paıdalanýǵa beriledi. Al 2026 jylǵa qaraı Qajymuqan atyndaǵy ortalyq stadıondy jańartý josparlanyp otyr.
Budan keıin respýblıkalyq saılaýaldy shtabtyń músheleri Shymkent qalalyq jumyspen qamtý ortalyǵynda boldy. Onda amanattyqtar partııanyń halyqty turaqty jumys jáne laıyqty tabyspen qamtý baǵytyndaǵy josparymen bólisti. Maqsat Tolyqbaıdyń aıtýynsha, partııa áleýmettik mańyzdy kásip ıesi – mádenıet salasynyń mamany, kitaphanashy, tótenshe jaǵdaı, tabıǵatty qorǵaý, orman jáne balyq sharýashylyǵy qyzmetkerleriniń jalaqysyn arttyrýǵa yqpal etedi. Úkimettiń 2027 jylǵa deıin medısına qyzmetkerleriniń ortasha jalaqysyn eki ese arttyrýyn qamtamasyz etý de kózdelip otyr. Tehnologııalyq kásipkerlikti damytý arqyly ekonomıkadaǵy joǵary eńbekaqy tólenetin jumys oryndarynyń úlesin arttyrý, sondaı-aq, derbes jumyskerler – taksı júrgizýshisi, deldal, frılanserlerdiń eńbek quqyǵy men múddesin qorǵaýǵa basa nazar aýdarylmaq.
Sondaı-aq shtab músheleri Shymkent qalasynda belsendi jastarmen kezdesip, «Jastar rýhy» jastar qanaty múshelerimen birge «Esikten esikke» aksııasyna qatysty. Sonymen birge qaladaǵy «Barys» bazarynda saýda salasynyń qyzmetkerlerimen jáne ózin-ózi jumyspen qamtyǵan jastarmen ekspromt-kezdesý ótti.
Kandıdat aldaǵy saılaý Memleket basshysy Qasym-Jomart Toqaevtyń bastamasymen iske asyp jatqan aýqymdy saıası reformalardyń laıyqty jalǵasy ekenin atap ótti.