Jańa joba ataýy – uıashyqty beton

Oral óńirinde qurylys ındýstrııasynyń jańa ónimi – uıashyqty beton óndirisi óz jumysyn bastap otyr. Buǵan deıin salada qoldanylyp kórmegen bul joba qabyrǵalyq materıaldar qataryn tolyqtyrmaq. Mamandardyń málimdeýinshe, munyń basty artyqshylyǵy otqa janbaıdy. Jylý saqtaǵysh qasıeti joǵary. Sondaı-aq, jazdyń ystyq kúnderinde salqyn temperatýrany da birqalypty ustap tura alady. Shýdy ótkizbeıdi. Elimizde balamasy joq jańa jobany iske asyrýǵa «Batys Qazaqstan qurylys materıaldary korporasııasy» AQ bas­tamashy boldy. Bul baıyrǵy kásip­orynda buǵan deıin qabyr­ǵalyq materıal – sılıkat kirpish ja­saıtyn eki úlken seh bar bolatyn. Munyń birinshisinde burynnan qalyptasqan úrdis boıynsha atalǵan qurylys materıaly shyǵarylyp keledi. Bul óndiris oshaǵy zamanaýı sheteldik qural-jabdyqtarmen jabdyqtalǵan. Osyndaı teh­nı­kalyq jańǵyrtýdan ótkizilgen korporasııa ónimderine qashan da suranys mol. Al mundaǵy ekinshi sehtyń qural-jabdyqtary moraldyq turǵydan eskirip, óndiristiń búgingi joǵary talaptaryna ja­ýap bere almaıtyndaı kúıge jetken edi. Osyny eskerip, korporasııa jetekshileri ony túbegeıli qaıta qurý jáne jańǵyrtý jobasyn jasaqtady. Beınelep aıtqanda, tyńnan túrilgen túren joǵaryda aıtylǵandaı elimizde paıdalanylyp kórmegen qabyrǵalyq materıal – uıashyqty beton óndirisin órkendetýge jol ashty. – Jobany júzege asyrý úshin «Sberbank» AQ-tyń Oraldaǵy fılıalynan 200 mıllıon teńge nesıe alyndy. Onyń paıyzdyq mólsherlemesin «Bıznestiń jol kartasy-2020» baǵdarlamasy boıynsha sýbsıdııalaý qajet degen uıǵarymǵa keldik. Osy oıymyzdy aıaǵyna deıin jetkizý úshin jobamyzdy aımaqtyq úılestirý keńesiniń qaraýyna usyndyq. Bul munda oń sheshimge ıe boldy. Iаǵnı, qazirgi kezde nesıeniń jalpy mólsheriniń 7 paıyzy korporasııa, 6 paıyzy memleket esebinen ótelýde. Taǵy bir aıtaıyn degenim, jańa jobany iske asyrýǵa tek ekinshi deńgeıdegi banktiń qarajaty ǵana emes, sonymen birge korporasııanyń da 86 mıllıon teńge qarajaty quıyldy, – dedi atalmysh kásiporynnyń óndiristik dırektory Ramazan Nurlıev. Jańa zaýyttyń óndiristik qýaty jylyna 25 myń sharshy metr uıashyqty beton óndirýge laıyqtalǵan. Qajetti qural-jabdyqtardy aldaǵy aptalardyń birinde Reseı zaýyttarynan ákelip ornatýǵa kelisimsharttar jasalǵan. Munda ónim óndirýge qajetti shıkizat máselesi de jetkilikti eke­nine kóz jetkizdik. Atap aıtqanda, korporasııa menshiginde ák tas, kvars qumy ken oryndary bar. Tek sement jóninde ǵana óz sheshimin tolyq taýyp úlgermegen máseleler kez­de­sedi eken. Alaıda, munyń da reti men sheshimin taýyp otyrmyz. Ony Reseıden tasymaldaý qazir­gi Keden odaǵy jaǵdaıynda, esh­qan­daı qıyndyq keltirmeıdi, deıdi mundaǵy óndiris janashyrlary. Temir QUSAIYN, «Egemen Qazaqstan». ORAL. Sýretti túsirgen Temirbolat TOQMAMBETOV.