«Aq jol» partııasy respýblıkalyq shtabynyń músheleri Pavlodar qalasyna bardy. Shtab músheleri Berik Dúısembınov, Dmıtrıı Vasılev, «Aq jol» dempartııasynan birmandatty okrýg boıynsha kandıdat Fýat Satybaev, jergilikti máslıhat depýtattyǵyna kandıdattar Pavlodar oblysyndaǵy «Merýsarıı jáne K» JShS eńbek ujymymen kezdesti.
Aqjoldyqtar partııanyń saıası baǵdarlamasyn tanystyryp, sybaılas jemqorlyqqa qarsy kúres, parlamenttik respýblıkaǵa kóshý máselelerine toqtaldy. Sondaı-aq, ıpotekalyq nesıeniń joǵary paıyzdyq mólsherlemeleri, jumyssyzdyq, salalyq qosymsha qun salyǵy mólsherlemeleri, offshorlardaǵy qarjyny qaıtarý, ınflıasııamen kúres jáne turǵyn úı baǵasynyń qymbattaýyna qatysty máseleler kóterildi.
Partııanyń saılaýaldy baǵdarlamasyn tanystyrǵan soń kandıdattar Parlamentte atqarylǵan jumystar jaıly aıtty. Jumysshylar kókeıdegi suraqtaryn qoıdy. Kópshilikti áleýmettik ádilettilik, «Jeke tulǵalardyń bankrottyǵy týraly» zań men ádil saılaý máseleleri qyzyqtyrdy.
Jumysshylardyń biri táýelsiz baqylaýshylar sanynyń jetkiliksizdigin aıtyp, halyqtyń saılaýdyń ádil ótetinine senýden qalǵanyn, tájirıbe kórsetkendeı, saılaý ýchaskelerine kelmegen adamdardyń ornyna bıýlletender toltyrylatynyna nazar aýdardy.
«Saılaý úderisiniń ashyqtyǵy men jarııalyǵyn qamtamasyz etý maqsatynda biz daýys berý kúni saılaý ýchaskelerindegi barlyq rásimderge beınebaqylaý engizýdi usynamyz. Sondaı-aq, elektrondy daýys berýdi engizýdi qarastyrý qajet. Qazir barlyǵyn telefon arqyly jasaımyz. Kóptegen saılaýshylar daýys berý kúni kezekte turǵysy kelmeı, daýys berý quqyǵyn paıdalanbaıdy. Bul tarmaqtardy engizbeıinshe, daýys bergenderdiń naqty sanyn bile almaımyz», dedi Berik Dúısembınov.
Jıyn barysynda ujym qyzmetkerleri birqatar túıtkildi máselege toqtaldy. Mysaly, nesıe ósimi, baǵa turaqsyzdyǵy, baspananyń qoljetimsizdigi týraly oılaryn aıtty. Kandıdattar kásiporyn men eńbek ujymyn qoldaıtynyn aıtyp, Parlamentte «Aq jol» fraksııasy qurylǵannan keıin bul máselelerdi Úkimet aldynda kóterýge daıyn ekenin málimdedi.