Memleket basshysy Qasym-Jomart Toqaev Almaty oblysynyń ákimi Marat Sultanǵazıevti qabyldady, dep habarlaıdy Egemen.kz Aqordaǵa silteme jasap.
Prezıdentke óńir ekonomıkasynyń ósimin qamtamasyz etý, halyqtyń turmys sapasy men tabysyn arttyrý, sondaı-aq jańa oblys ortalyǵyn damytý jónindegi tapsyrmalarynyń oryndalý barysy týraly esep berildi. Marat Sultanǵazıevtiń aıtýynsha, byltyr oblysta áleýmettik-ekonomıkalyq damýdyń barlyq negizgi salasy boıynsha turaqty ósim kórsetkishi saqtalǵan. 37,2 myń jumys orny ashylǵan. Onyń 26,3 myńy – turaqty jumys. Memleket basshysyna óńirde sý tasqynyna qarsy is-sharalardy iske asyrý, turǵyndar men sharýashylyq nysandarynyń qaýipsizdigin qamtamasyz etý jáne tabıǵı apattar saldarynan bolatyn zalaldy múmkindiginshe azaıtý jóninde málimet berildi.
Prezıdentke oblys ortalyǵyn damytýdyń 2030 jylǵa deıingi keshendi damý josparynyń ázirlený barysy týraly baıandaldy. Ákim kóktemgi egin egý jumystaryna, saıajaı alaptary jónindegi túıtkilderdiń sheshilýine, ınjenerlik ınfraqurylymnyń rekonstrýksııasyna jáne aýyl sharýashylyǵy maqsatyndaǵy ıgerilmeı jatqan jerlerdi memleketke qaıtarýǵa qatysty máseleler týraly aıtty.
Qasym-Jomart Toqaev oblys ákimine ortalyq memlekettik organdarmen birlesip, Qonaev qalasyn damytý josparyn pysyqtaý jónindegi júıeli jumystardy jalǵastyrýdy, sondaı-aq oblys aýmaǵyn keshendi damytý mindetterin júzege asyrýdy tapsyrdy.