Medeý shatqalyndaǵy aksııa

Parlament Májilisine kandıdattar Aınur Sábıtova men Vladımır Martel jastarmen birge densaýlyq baspaldaǵymen kóterilip, «Baıtaq» partııasynyń týyn kókke kóterdi. Aksııa aıasynda ótkizilgen is-sharalar ekologııalyq mádenıetti, sportty damytýǵa jáne salamatty ómir saltyn ustanýǵa baılanysty boldy.

Aınur Sábıtova búgingi jastar óte belsendi jáne pozıtıvti ekenin atap ótti. «Qazirgi urpaq bolashaqqa úmitpen qarap, úlken ózgeristerdi kútip otyr. Mundaı sátterde ekologııalyq jaýapty adamdardyń birtutas qoǵamyn qurý tásilderin durys qalyptastyrý jáne túsiný óte mańyzdy. Mundaı qoǵam óz kezeginde aýanyń, sýdyń, tabıǵattyń tazalyǵy sııaqty máselelermen kúresetin bolady», dedi ol.

Vladımır Martel óz kezeginde Medeý taý shatqalynda ótkiziletin barlyq is-sharalar ekologııalyq mádenıetpen jáne tabıǵatqa uqypty qaraýmen baılanysty ekenin aıtty. «Búgingi tańda salamatty ómir saltyn ustaný jáne ony damytý baǵytyndaǵy is-sharalar óte mańyzdy», dep atap ótti kandıdat.

«Baıtaq» jasyldar partııasynyń ókilderi dárigerlermen de kezdesti. Saıası uıym tóraǵasy elordadaǵy kópsalaly áleýmettik-medısınalyq mekemelerdiń birinde saılaýaldy baǵdarla­ma­ny tanystyryp, saýaldarǵa jaýap berdi. Aq halatty abzal jandar qoǵamdaǵy túıtkildi máselelerdi kóterip, olardy sheshý joldary boıynsha usynystaryn aıtty. Atalǵan mekemede 60-qa jýyq maman eńbek etedi. Júzdesý barysynda partııa belsendileri elde júrgizilip jatqan saıası reforma tóńireginde oı bólisip, pikir almasty. Úgit-nasıhat jumystarynyń aıaqtalýyna az ýaqyt qaldy. Bul rette kestege saı is-sharalar qyza tústi. Aıta keteıik, baıtaq­tyqtar qazir úsh jarym myńnan astam kezdesý uıymdastyrdy. Aldaǵy kúnderi respýb­lıkalyq shtab ókilderi ońtústik óńirlerdi aralaýdy josparlap otyr.

«Respýblıkalyq shtab pen barlyq aımaqtaǵy shtabtardyń jumysy baqylaýda. Halyqtyń saılaýǵa degen yntasy joǵary. Saılaýdan úlken úmit kútip otyr», dedi partııa tóraǵasy Azamathan Ámirtaev.