«Baıtaq» jasyldar partııasynan Parlament Májilisiniń depýtattyǵyna kandıdat Nurlan Kóptileýov jáne partııa ókilderi Aqmola oblysyna bardy. Baıtaqtyqtar eń áýeli Shýchınsk qalasymen qaptaldas ornalasqan zańsyz qoqys polıgonyn kózben kórdi.
Ekologııa mınıstrligi Astanamen shekaralas aımaqta jáne Aqmola oblysy aýmaǵynda ruqsat etilmegen zańsyz polıgondar sanynyń tym kóptigin atap ótken bolatyn. «Úlken qoqys alańy óz aldyna, kishigirim qoqys úıindisiniń ózi topyraqty, aýany jáne sýdy ýlaıdy. Qoqys alańynyń taǵy bir zııandy saldary – qoqystan bólinetin ýly gaz. Munyń zardabyn eń aldymen osyǵan qarsy kúresip jatqan Shýchınsk qalasynyń turǵyndary tartyp otyr. Polıgon gazy ottegi bolmaǵan kezde organıkalyq zattardyń ydyraýynan paıda bolady jáne kómirqyshqyl gazy, kómirtegi totyǵy, metan jáne ushpa organıkalyq qosylystardan turady», dedi Nurlan Kóptileýov.
«Byqsyp janyp jatqan qoqystyń zııany kem degende allergııa, demikpe, ókpe aýrýlary jáne JRVI-men aýyratyn adamdarǵa zalalyn tıgizedi. Onsyz da dert dendegen naýqastyń aýrýy asqynyp, demi jetpeı tunshyǵady, ártúrli allergııalyq reaksııalar bere bastaıdy. Al ýly zattardyń udaıy aýaǵa jaıylýy qoqys polıgonyna jaqyn mańdaǵy jandardy ólimge dýshar etýi múmkin», deıdi partııa belsendileri.
Belsendiler elimizge shuǵyl túrde jańa úlgidegi zańdy qoqys polıgondary aýadaı qajettigin atap ótti. Al ruqsat etilmegen polıgondardy joıý úshin turaqty negizde úzbeı reıdter júrgizý kerek. Sonymen qatar qorshaǵan ortany lastaıtyn zııandy oshaqtardy da joıǵan jón.
Jalpy, elde qalalardaǵy aýanyń joǵary deńgeıde lastanýy, qatty turmystyq qaldyqtar polıgondarynyń nashar jaǵdaıy jáne jaıylym jerleriniń tozýy máselesi óte ózekti. Osydan eki jyl buryn Qazaqstanda atmosferalyq aýa sapasyn monıtorıngileý nátıjesinde megapolıster men iri qalalarda lastanýdyń shekten tys kórsetkishi tirkelgen edi. Atap aıtqanda, Temirtaý, Astana, Almaty, Aqtóbe, Atyraý, О́skemen, Qaraǵandy, Balqash, Jezqazǵan men Shymkent qalalary lastanýdyń óte joǵary deńgeıde. Jyl saıyn Qazaqstanda 4,5 mıllıon tonna qatty turmystyq, shamamen 31,6 mıllıard tonna ónerkásiptik qaldyq túziletinin atap ótken jón.