Oqýshylardyń ınttelektýaldyq áleýetin shyńdaýǵa baǵyttalǵan «Zerde» XVIII respýblıkalyq konkýrsy óz máresine jetti. Elimizdiń ár óńirinen kelgen 2-7-synyp oqýshylary 3 kún boıy 500-ge jýyq joba qorǵady, dep habarlaıdy Egemen.kz.
«Daryn» RǴPO-nyń habarlaýynsha, konkýrstyń qorytyndysy boıynsha bas júldeni 16 oqýshy jeńip aldy. 63 oqýshy I dárejeli dıplomǵa ıe bolsa, 2-shi oryn - 94, 3 oryn 155 oqýshyǵa berildi.
Oqýshylardyń 12 seksııa boıynsha qorǵaǵan zertteý jumystaryn elimizdiń joǵarǵy oqý oryndarynyń ǵalym-professorlary men medısınalyq kolledjdiń aǵa oqytýshylary baǵalady. Qazylar alqasy respýblıkalyq konkýrsqa kelgen ár qatysýshy kótergen taqyryptyń aýqymy keń, jas ǵalymdardyń izdenisi joǵary ekenin erekshe atap ótti.
«Oqýshylar usynǵan jobalarynyń kópshiligi erekshe. Bir-birin qaıtalamaıdy, sonyń ishinde meniń nazarymdy aýdarǵan birneshe zertteý jumysy boldy. Fızıka, ǵarysh seksııasy boıynsha Almaty oblysynan kelgen oqýshy kún sáýlesinen energııa alatyn qurylǵy jasaǵan. Onyń jobasy tek maket emes, tolyq jumys istep tur, 5-6 telefondy zarıadtaýǵa múmkindik beredi. Medısına, psıhologııa, ekologııa seksııasy boıynsha «Veıp - jańa zaman oıynshyǵy ma, álde qaıtymsyz densaýlyq pa?» degen taqyryp kóterildi. Júldegerdiń biri - balamaly energııa kózderin óndirýdi usyndy. Barlyǵy da jan jaqty tolyq zerttelgen jumystar», deıdi L.Gýmılev atyndaǵy EUÝ professory, qazylar alqasynyń tóraǵasy Tilegen Sadyquly.
Aıta keteıik, «Zerde» XVIII respýblıkalyq konkýrsyna Qazaqstan boıynsha 2-7-synyp aralyǵynda oqıtyn 600-ge jýyq oqýshy qatysty.