Memleket basshysy bilim salasy týraly salmaqty oı qozǵap, ustazdarǵa qoıylatyn talaptyń joǵary bolýy kerek ekenin jetkizdi. О́zim uzaq jyldar osy salada qyzmet atqarǵandyqtan, bilim salasy týraly aıtqandaryna erekshe mán berdim.
Prezıdent óz sózinde bilim sapasyn, ásirese orta bilimniń deńgeıin arttyrý úshin batyl sheshim qabyldaý qajet ekenin aıta kelip: «Maǵan keıbir tájirıbeli ustazdar tıisti mınıstrlik daıyndaǵan tapsyrmalar tym kúrdeli dep shaǵymdandy. Bálkim, ony jeńildetý, jetildirý kerek shyǵar. Bul salada qatyp qalǵan qatań ereje bolmaýy kerek. Biraq negizi ustazdarǵa qoıylatyn talap joǵary bolýǵa tıis», dedi.
Shynynda da muǵalimderdiń biliktilik emtıhanynda artyq talaptar bar ekeni ras. Ony uzatpaı rettese bolady. Alaıda bilim sapasy tikeleı ustazǵa baılanysty ekeni anyq. Biz bilimdi urpaq daıarlap shyǵarý úshin muǵalimderdiń bilimdiligine, biliktiligine, iskerligine basa nazar aýdarý qajet. Máselen, mektepterdi zamanaýı qural-jabdyqpen jaraqtap, materıaldyq-tehnıkalyq bazasyn qansha nyǵaıtqanymen, oqýshynyń sapaly bilim alýy ustazdyń qolynda. Sondaı-aq oqytýshynyń boıynda biliktiligimen birge, ustazdyq qasıeti de bolýy qajet. Eger ol óte bilikti bolǵanymen jańaǵy qasıet boıynan tabylmasa, oqýshyǵa óz dárejesinde bilim bere almaıdy. Sondyqtan osy qasıetti qatar ustanǵan ustazdyń juldyzy jaryq.
Sonymen birge Memleket basshysy muǵalim tapshylyǵyn jeleý etip, mektepke kez kelgen adamdy jumysqa ala berýge bolmaıtynyn aıta kelip, muǵalim daıarlaý isin jetildirý úshin naqty sharalar qabyldaý qajet ekenine mańyz berdi. «Bizde Prezıdenttik jastar kadr rezervi bar. Dál sol sııaqty bilim salasyna ózgeris ákeletin 1 myń maman arnaıy daıyndyqtan ótetin bolady. Osyǵan oraı tıisti baǵdarlama qabyldanady.Kadr máselesi joǵary bilim berý júıesi úshin de óte ózekti», dedi Prezıdent.
Jıynda kóterilgen kadr máselesi de kóńilimnen shyqty. О́z tájirıbemnen bir mysal keltireıin. Eńbek jolymdy matematıka páni muǵalimi bolyp bastap, odan soń mektep dırektorynyń tárbıe isi jónindegi orynbasary, sosyn oqý isi jónindegi orynbasary boldym. Sosyn mektep dırektorlyǵyna taǵaıyndaldym. Osyndaı baspaldaqtan ótken mamannyń tájirıbesi molaıyp, isi alǵa basady. Buryn mektep dırektorlary arnaıy kýrsta oqyp, bilikti mamandardyń dárisin tyńdaıtyn. Onda mekteptegi oqý úderisi, tárbıe jumysy, bári aıtylady. Zańnama qujattarymen de tanystyrady. Mektep dırektory bolý ońaı emes. Úlken jaýapkershilikti júkteıdi.
El Prezıdenti Qasym-Jomart Toqaevtyń VIII saılanǵan Parlamenttiń alǵashqy sessııasynda sóılegen sózi depýtattarǵa óz mindetterin sapaly oryndaýǵa jol siltegen nusqaý boldy dep esepteımin.
Aıagúl MIRAZOVA,
Qazaqstannyń Eńbek Eri