Ulttyq mýzeıde 1916 jylǵy Torǵaıdaǵy ult-azattyq kóterilisi qaharmany Amangeldi Imanovtyń týǵanyna 150 jyl tolýyna oraı «Halyq batyry» atty kórme ótip jatyr.
Bul kórmege Qostanaı oblystyq tarıhı-ólketaný mýzeıi men Arqalyq qalasyndaǵy Dala ólkesi tarıhy oblystyq mýzeıi jáne Amangeldi aýdanyndaǵy batyr atyndaǵy memorıaldyq murajaıynan dańqty tulǵanyń ómirine qatysty biraz jádiger ákelingen. Sondaı qundy dúnıeniń biri – Amangeldiniń senimdi serigi, áıgili mergen Keıki batyr áýletiniń kebejesi. Ony Arqalyqtaǵy Dala ólkesi tarıhy oblystyq mýzeıine Nuraly Erbosynov esimdi azamat syıǵa tartqan.
Kebeje – sandyq sekildi tamaq saqtaýǵa arnalǵan jıhaz. Ol elimizdiń barlyq aımaǵynda kezdesedi. Jasaý tásili men syrtqy pishini uqsas. Tek olardyń ereksheligin aldyńǵy betin kórkemdeý tásilinen baıqaısyz. Batyr úıiniń kebejesi de taqtaıdan jasalǵan. Mańdaıshasy men esigi qazaqy oıýlarmen órnektelgen. Tómengi sýyrmanyń betine «1916 jyl» dep jazylǵan.
1916 jylǵy Torǵaıdaǵy ult-azattyq kóterilisinde Keıki Kókembaıuly mergender jasaǵyn basqaryp, eren erliktiń úlgisin kórsetti. El ishinde «Amangeldiniń kózi mergen, Keıkiniń qoly mergen» degen sóz bar. Qos batyrdyń erlik joly jurt jadynan óshken emes.