Elorda damýyndaǵy kásipkerler róli

Elorda kúni merekesi qarsańynda, ıaǵnı keshe Ortalyq kommýnıkasııalar qyzmetinde «Astanany damytýdaǵy kásipkerlerdiń róli» degen taqyrypta Astana qalasy Kásipkerler palatasynyń tóraǵasy Meıirbek Májıtov pen «Astana qalasy kásipkerleriniń quqyn qorǵaý jónindegi assosıasııasy» ZTU prezıdenti, Kásipkerler palatasy óńirlik keńesiniń múshesi Pavel Kazansevtiń qatysýymen brıfıng bolyp ótti. Astana tek astanalyqtardyń ǵana mereıi emes, elimizdiń árbir azamaty úshin mańyzdy, degen M.Májıtov elimiz damýynyń lokomotıvine aınalyp otyrǵan elorda qurylys, kólik, azyq-túlik jáne basqa da salalardyń qarqyndy damýyna úles qosýda ekendigine toqtaldy. Bul rette Astana qalasy Kásipkerler palatasynyń ashylýy elorda kásip­­­kerleri úshin asa mańyzdy oqıǵalar­dyń biri bolǵan. Elordadaǵy kásipker­likti damytýǵa arnalǵan bul palata memleket pen jeke menshiktiń seriktes bolýy nıetin dáleldep otyr. Palata qyz­metiniń strategııasy, eń aldymen, Elbasynyń kásipkerler aldyna qoıǵan maqsattaryn júzege asyrý. M.Májıtovtiń aıtýynsha, qazir­gi tańda elordada 56 myńǵa jýyq kásipker belsendi jumys atqarýda. Bul – ótken jylmen salystyrǵanda 17 paıyzǵa kóp. Al olardyń óńirlik jalpy ónimdegi úlesi 60 paıyzǵa jetse, qala bıýdjeti túsiminiń 67 paıyzy solardyń enshisinde eken. О́tken jyldyń qorytyndysy boıynsha ónim óndirý 1 trıllıon 200 mıllıard teńgege jetkendigi de alǵa tartyldy. Qalalyq Kásip­kerler palatasy tóraǵasynyń paıymynsha, bul elordada orta jáne shaǵyn bıznes salasyn damytýda aıtarlyqtaı áleýet bar ekendigin kórsetedi. О́z kásipterin jańadan bastaǵan kásipkerlerge palata qalalyq ákimdikpen jáne «Damý» qorymen birlese otyryp, Astana qalasy kásipkerlerge qyzmet kórsetý ortalyǵyn ashyp berse, 6 aıdyń ishinde oǵan 1100 kásipker ótinishpen kelipti jáne de 300-ge tarta keńes berilgen. Kásipkerge «bir tereze» qaǵı­daty boıynsha tolyq paketti qyzmet kórsetý qolǵa alynypty. Budan basqa, qalalyq Kásipkerler palatasy otandyq kásipkerler men sheteldik ınvestorlar úshin www.astana2050.kz. bıznes portalyn ashqan kórinedi. Jáne de 1600 kásipkerdi qamtyǵan 30-ǵa tarta oqytý baǵdarlamalary júze­ge asyrylǵan. Palata tóraǵa­sy muny astanalyqtar arasyn­da kásipkerlikke degen qyzyǵý­shylyqtyń artyp kele jatqan­dy­ǵymen túsindirdi. Onyń sózi­nen­ belgili bolǵandaı, qazirgi kezde qalalyq palata «Astanada jasalǵan» degen taýarlar jıyntyǵyn jarııalaı bastapty. Osylaısha, uıymdastyrýshylar elordalyq ónimderdi jergilikti jerde ǵana emes, halyqaralyq rynoktarǵa shyǵarýdy maqsat etip otyrǵandyqtaryn jetkizdi. Sonymen qatar, palata «Bız­nestiń jol kartasy-2020» baǵdarla­masy sheńberinde jyl sońyna deıin 1500 kásipkerge servıs­tik qyzmet kórsetý baǵytynda qoldaý bildiretindigi atap aıtyldy. Palatanyń taǵy bir basym maqsattarynyń biri – adam kapıtalyn damytý. Bıznestiń bilikti mamandarǵa degen suranysyn qanaǵattandyrý maqsatynda ol elordalyq bıznesmendermen birlesip, qaladaǵy memlekettik qurylys-tehnıkalyq kolledji bazasynda Resýrstyq-tehnologııalyq ortalyq ashypty. Qazirgi tańda elordada qarqyndy júrip jatqan qurylys salasynda suranys pen usynystyń arasynda aıyrma­shylyq bar ekenin jartyjyldyq baqylaýdyń nátıjesinde anyqtaý múmkin bolsa, endi aqyly túrde oqytylǵan mamandar sol oryndardy ıelenbek eken. Taǵy bir belgili bolǵany, pala­tanyń uıytqysymen Qala kúnin toılaý sheńberinde «Qazaq eli» alańynda 5-7 shildede «Shýaqty qala» festıvali ótedi dep kútilýde. Kásipkerlerdiń óz brendterin pash etý jáne ónimderin saýdaǵa shyǵarý úshin alańdar tegin berilip otyrǵandyǵy da atap kórsetildi. Endi qalalyq kásipkerler úshin óziniń sapaly ónimderin ótkizýde jáne qyzmet kórsetýde úlken múmkindikter ashylýda. Elordada qalalyq kásipkerlermen ótken jıynda qala ákimi Imanǵalı Tasmaǵambetov úzdik kásipkerlerdi anyqtaıtyn konkýrs ótkizý týraly usynys aıtsa, ony basshylyqqa alǵan Astana Kásipkerler palatasy «Úzdik ınvestor», «Úzdik mesenat» jáne «Úzdik kásipker» nomınasııalary boıynsha kásipkerler arasynda konkýrs ótkizgendigin qaperge sala ketken jón. Al onyń qorytyndysy 5 shilde kúni Elbasynyń qatysýymen ótetin saltanatty jıynda jarııalanatyn bolady. P.Kazansev búgingi tańda ákim­shilik kedergilerdiń kemip kele jatqandyǵy kásipkerlikke degen qyzyǵýshylyqty arttyryp otyr degen kózqarasymen bólisti. Asqar TURAPBAIULY, «Egemen Qazaqstan».