Elorda men Elbasy - egiz uǵym

Osydan dál 20 jyl buryn el astanasyn aýystyrý týraly tarıhı sheshim qabyldanǵan edi.

6 shilde – elordanyń týǵan kúni. 6 shilde – El­ba­synyń da týǵan kúni. Elorda men Elbasy egiz uǵym deıtinimiz sondyqtan. Týǵan kúniń qutty bolsyn, aıaýly elorda! Týǵan kúnińiz qutty bolsyn, ardaqty Elbasy!

Eldiktiń eńseli sımvoly

Astana kúnine oraı Memlekettik týdy kóterý rásimi ótkizildi

Keshe Astana kúni qarsańynda «Atameken» etno-memorıaldyq kesheni janyndaǵy Memlekettik tý tigilgen alańda Tuńǵysh Prezıdenttiń Memlekettik týdy kóterý, elimizdiń áskerı oqý oryndarynyń úzdik bitirýshilerine ofıserlik pogon tabystaý jáne merekelik sharalardy iske qosý saltanatty rásimi bolyp ótti. Memlekettik týdy saltanatty jaǵdaıda kóterý rásimi –turaqty dástúrge aınalǵan úlgili úderis. Onyń ústine bul Astana merekesiniń resmı bastalýynyń kórinisi de. Qala turǵyndary men qonaqtaryn elorda kúnin merekeleýge shaqyrǵan atalǵan shara hattamalyq-saltanatymen qatar, táýelsizdik pen memleketshildik ıdeıasyn azamattar sanasyna sińiretin tereń ıdeologııalyq máni barlyǵymen de erek. Sondaı-aq, ár jyly Astana kúnin atap ótý arqyly elimiz óziniń jetistikterin pash etip, Qazaqstannyń jańa astanasy tarıhynyń kezekti baspaldaqqa qadam basqandyǵyna kýá bolyp keledi. Mine, osyndaı máni tereń shara­ny tamashalaýǵa kelýshiler bıyl da asa kóptigimen erekshe­lendi. Shaǵyn ǵana alańǵa syı­ma­ǵan astanalyqtar men qala qonaq­tarynyń keıbiri aıtýly sharany alystan da tamashalap turdy. Áskerı orkestrdiń oınaýy jáne Astanaǵa arnalǵan ánderdiń shyr­qalýy sharanyń saltanatyna erekshe reńk berdi. Munyń ózi onsyz da merekelik kóńil-kúı­di odan saıyn bir kóterip tas­tady. Jınalǵan qaýymnyń qol­daryn­daǵy merekelik jalaý­sha­lardyń jelbireýi osyny anyq ańǵartty. Astanalyqtar men qala qo­naq­tary tamashalaýǵa kelgen saltanatty rásimge Memlekettik kúzet qyzmetiniń Qurmet qaraýyly rotasy, Qorǵanys mınıstrliginiń Qurmet qaraýyly rotasy jáne Ishki ister mınıstrligi Ishki ás­kerleriniń Ulttyq ulany rotasy da qatysty. Elbasy – Qarý­ly Kúshterdiń Joǵarǵy Bas qolbasshysy N.Á.Nazarbaev sharanyń bastalýyna birer mınýt qalǵanda keldi. Jınalǵan qaýym­ǵa bet alǵan Elbasyn áskerı orkestr «Elim meniń» ánimen, al jınalǵan qaýym qoldaryna us­taǵan jalaýshalaryn joǵary kóterý arqyly erekshe qurmetpen qoshemet kórsetip qarsy aldy. Bir mezette tyna qalǵan orkestr men jınalǵandardyń qoshe­metti shýynan keıin: «Pre­zıdent myrza! Qazaqstan Respýb­lıkasynyń Memlekettik týyn kóterý jáne jas túlekterge leıtenant shenin saltanatty tapsyrý rásimine daıynbyz. Qazaqstan Respýblıkasynyń Qurmetti qaraýylynyń bastyǵy aǵa leıtenant Qaseıin Jasbolatuly», dedi jas ofıser. Sodan soń Memlekettik Ánuran oınalyp, Memlekettik tý kóterildi. Prezıdent qala turǵyndary men qonaqtaryn Astana kúnimen quttyqtaı otyryp, barsha qa­zaq­standyqtarǵa óz sózin arnady. – Bizdiń baıraǵymyz Birikken Ulttar Uıymy ǵımara­tynyń janynda, barlyq el­derdegi elshilikterimizdiń ǵıma­rattarynda jelbirep tur. Ol Qazaqstan sport­shylarynyń ha­lyqaralyq jarys­tardaǵy jeńis­teriniń qurmeti úshin de kókke kóteriledi. Tý – pat­rıotızm men Otanymyzǵa degen adaldyqtyń sımvoly, – dedi Nur­sultan Na­zarbaev. Qazaqstan Prezıdenti Asta­nanyń jas bolsa da, elimizdiń elordasy retinde aıtarlyqtaı tabystarǵa jetkenine toqtaldy. – Elordamyz nebári 16 jylda súıikti qalamyzǵa, búkil elimizdiń ortalyǵyna aınaldy. Halyqaralyq aýqymdaǵy mańyzdy is-sharalardy ótkizý arqyly ol endi búkil álemge tanyldy. EQYU sekildi bedeldi uıym óz sammıtin bizdiń elordamyzda ótkizýge bolady dep uıǵardy. Munda basqa da eleýli ekonomıkalyq jáne saıası sıpattaǵy sharalar ótti. As­tana Eýrazııa keńistigindegi yq­pal­dastyq úderisterdiń besigine aınaldy, – dedi Memleket basshysy. Qazaqstan Prezıdenti Astana kúnine oraı árdaıym jańa nysandar iske qosylatynyn, solardyń qatarynda bıyl Ulttyq mýzeı, Tuńǵysh Prezıdent kitaphanasy bar ekenin aıtty. – Shaǵyn qala bolǵan Aqmola – búginde 800 myńnan astam adam turatyn megapolıs. Astana turýǵa jaıly ári qolaıly qala bolyp qalyptasyp keledi. El qazynasyna edáýir qarajat ákele bastaǵan elordamyz bıýdjettiń donoryna aınaldy. Bıznes belsendi damyp, ınnovasııalar engizilýde. Astana, sondaı-aq, bilim berý, densaýlyq saqtaý jáne mádenıet salalarynyń mańyzdy ortalyǵy bolyp otyr. Sol sebepti de biz óz elordamyzdy jaqsy kóremiz jáne onymen maqtanamyz, – dedi Memleket basshysy. Saltanatty rásim barysynda Memleket basshysy – Qazaqstan Respýblıkasy Qarýly Kúshteriniń Joǵarǵy Bas qolbasshysy elimizdiń joǵary áskerı oqý oryndarynyń túlekterine ofıserlik pogondar tapsyrdy. – Sizder Qarýly Kúshterdiń, polısııa men ózge de quqyq qorǵaý organdarynyń qatarynda qyzmet etetin bolasyzdar. Iyǵyna pogon taqqan azamattar ylǵı da eldiń kóz aldynda. Sizderge qarap jastar boı túzeıdi. Sizder daıyndyqtan ótip, bilim aldyńyzdar, endi ózderińiz jańadan qabyl­da­ný­shylarǵa tálimger bolasyzdar. Olarǵa patrıotızmniń, Otanǵa adal­dyqtyń úlgisin, erlik pen adam rýhynyń kórkemdigin kórse­te­sizder degen úmittemin, – dedi Nursultan Nazarbaev. Sońynda Memleket basshy­sy barsha jas ofıserlerdi, ás­ke­rı oqý oryndary túlekterin qut­tyq­tap, olarǵa tabys jáne baq-bereke tiledi. Memleket basshysynyń qoly­nan ofıserlik pogondy qorǵanys mınıstrliginiń Radıoelektronıka jáne baılanys Áskerı-ınje­nerlik ınstıtýty men Qurlyq ás­ker­leriniń áskerı ınstıtýty, QR UQK Shekara qyzmeti akademııasy, Tótenshe jaǵdaılar mınıstrliginiń Kókshetaý tehnıkalyq ınstıtýty, QR Ulttyq ulanynyń áskerı ınstı­týty sekildi joǵary áskerı oqý oryndarynyń 12 úzdik túlegi aldy. Asqar TURAPBAIULY, «Egemen Qazaqstan». Sýretterdi túsirgender S.BONDARENKO, B.OTARBAEV.